په دایکنډي کې ترافیکي پېښې ۶ کسان وژلي او ۸ یې ټپیان کړي
د والي ویاند علي اکبر ناطقي نن جمعه ازادي راډيو ته وویل، پېښه تېر ماښام په مرکز نیلي کې شوې ده:
"په مرکز کې ټرافيکي پېښه شوې چې په نتيجه کې يې ٦ کسان مړه شوي او ٨ تنه نور ټپيان شوي دي. د پېښې علت ښايي خراب سړکونه او هغه درنه واوره وي چې په وروستيو کې ورېدلې ده."
ولايتي چارواکي وايي، په ټپيانو کې چې ټول روغتون ته انتقال شوي، د ٢ کسانو وضعيت نازک دى.
د ولايتي شورا يوه غړي د دې پېښې علت د موټر چلوونکو بې احتياطي ګڼلې ده.