Новости за 31.07.2019

18 шо долу йоI лоьхуш ю ГIалгIайчохь, хаам бо "Обзор" зорбанан гIирсо. Болчу хаамца, шинарин дийнахь Сурхотера яхархо ядийна шен кIайн Lada Priora машенахь хиллачу юьртахочо. ЙоI ядийна хиларх лаьцна дийцина цуьнан нанас. Цо дехар дина низамашлардон органашка иза схьалохуш гIодахьара аьлла. Талламан комитетехь дийцаре деш ду бехкечунна дуьхьал бехктакхаман гIуллакх доладарца доьзна хаттар. ЙоI мичахь ю цкъачунна хууш дац.

Шемара -цIа - набахте, Iалам карзахдаьлла, Iайшина -гIо

Вуно онда мох а хьокхуш, даккхий догIанаш делхаро зенаш дина Нохчийчохь. Дохийна цIенош а, социалан объекташ а. Мохо хедийна тоькан серий, галъяхна газан биргIанаш, зе дина школашна, дарбанан цIеношна. Хи доцуш йисина Хьалха-Мартанан а, ТIехьа-Мартанан кIошташкахь цхьамогIа ярташ. Цунах лаьцна хаам бина Нохчийчоьнан куьйгалхочо  Кадыров Рамзана, яздо "Нохчийчоь тахана" агенталло. Цо дийцарехь, Хьалха-Мартанан кIоштахь Гехи, Гехи-Чу, Рошни-Чу ярташкахь дохийначу цIенойн терахь хила мегаш ду 350 гергга. Читать дальше...

Черкес Лариса  Низам шардаро гуламашка бийла маршо лур юй Адыгейн бахархошна?  Нахана гуламашка муха, муьлхачу меттигашкахь бовла мега къасточу низамехь цхьалхачу пикетех дерг билгалдоккхуш, керла юкъадалораш арахецна Адыгейхь. Хийцамаш бан мехкан парламент декхарейинарг ю бакъоларъен "Мемориал" центр  цо мехкан прокуратуре кехат дахьийтинера, Адыгейн депутаташа хьалхо тIеэцначу низамехь бахархошна дина дехкарш ца догIу федералан низамца, аьлла.  Оьрсийчоьнан "Чоьнаш чохь а, арахь а дIахьочу гуламех... Читать дальше...

Шемахь тIом бина стаг чувоьллина Нохчийчохь. Оьрсийчоьнан ФСБ-н Къилба тIеман гонехула йолчу урхалан белхахоша кехаташ кечдина кхеле озийнарг ву 1997-чу шарахь Соьлж-ГIалахь вина Ханкаров Сулейм. ФСБ-н зорбан сервисо бинчу хаамца, ша дийрачух кхеташ зулам дина цо, Шема Iаьрбийн Республикехь цу мехкан низамашца йогIуш йоцчу тIеман тобанна юкъахь дакъа а лаьцна, ткъа иза догIуш ца хилла Оьрсийчоьнан Федерацин хьашташца. Соьлж-ГIалан Старопромыслан кхело бехке лаьрра Ханкаров и зулам дарна. Цунна 2 шо 6 бутт хан тоьхна суьдо колонехь даккха.

500 гергга стаг веанера ГIалгIайчохь дIаяьхьначу гIо-накъосталлин концерте. Цигахь гулдина ахча дIахьажор ду Москох Iилманан-талламан берийн хирургин институтан фонде, хаам бо ТАСС агенталло. Цунах доккхаха долу дакъа дойур ду хIара бутт болалуш гергарчу зудчо йиттинчу ГIалгIайчуьрчу йоIанна гIо дан, хаам бина цу республикан культуран министро Базоркин Микаэла. 7 шо долу Iайша Товбеца-беттан 5-хь Москох клинике дIакхачийнера дегIа тIехь йина дуккха а еза чевнаш а йолуш. И чевнаш цунна йина аьлла лаьцна ю йоIан дейиша. Читать дальше...

Оьрсийчоьнан Лаккхара суд реза ца хилла, 7 шо хан а тоьхна чувоьллинчу, Нохчийчоьнан вахархочунна Габзаев Шамилна йина кхел хийца. Иза бехке вина шен бевза нах Шема тIаме баха тIекIабарна. Хьалхо дийцина ма хиллара, кхушара Оханан-беттан 15-хь Ростох Къилбаседа Кавказан тIеман кхело 7 шаранна колоне хьажийра Габзаев. Талламан версица, Соьлж-ГIалахь ша вехачу хIусамна хьалха цо шена вевзачу 2 стаге къамелаш дина хиллера, цу шинга тIемалойн агIор тIом бан Шема ваха веза бохуш. Габзаевн адвокаташ цу хьокъехь латкъам бинера лакхарчу инстанце. Читать дальше...

110 эзар сов Нохчийчуьра вахархо висина Iалам карзахдаларна электросерло йоцуш. Цунах лаьцна хаам бо Оьрсийчоьнан энергетикан министралло. - Кхаарин Iуьйранна 4 сахьт даьллачу хенахь дуьйна хенан хIоттаман хьелаш талхарна (онда догIа, 25 километр секундехь мох) аварин кепахь ток яллар сецаш ду электросерло йоькхучу меттигешкахь, - аьлла ду цу хаамехь. Карарчу хенахь ток йоцуш юьсуш ю Хьалха-Мартанан а, ТIехьа-Мартанан а, Гуьмсан а кIошташ. Цу тайпаниг хилахь а аьлла кхоьллина сервисаш болх беш ю ток ялар меттахIоттош. Читать дальше...