Новости за 18.07.2019

Деношкахь Нохчийчоьнан синбахаман министралло дихкина филармони кIел боцчу артисташна эшарш лекха. Амма хьакхалуш доцчух тера ду иза «паччахьан» а, цунна беза-бевзачийн а самукъадаккха кхойкхучу Бурсагов Ачхьабах а, и санна «говза» болучех а.

Нохчочунна тIехIоьттина Рада, бакъонашларъярхоша "Iехийна" йоI, Новосибирскан мэр хила турлун нохчо а.

Хасаев Адам Нохчашна ловзаргахь стенах дIовш даьлла, ца кхета цкъачунна Австрера Iедал ТIамехь лелош йолу газ, я юуург ен газ – ши верси ю Австрерчу Инсбрукехь, нохчийн ловзаргахь, дукккха а наханна ун далар толлучу хьукматийн. Хьал гиначарна а, дIовш кхеттачарна а хетарехь, цхьамма диверси йина нохчашна дуьхьал. "Юуучух  дIовш хилла" "Ловзар доьрзучу кхаьчча доладелира дерриг а. Хьеший дIасабаха кечлуш бара, цIеххьана маьхьарий белча. Со накъосташца цхьана арахь вара, тхуна герз тоьхна моьттура, тхо чухьаьлхира. Читать дальше...

Социалан машанашкахь информаци яьржина, Нальчикерчу СИЗО-хь латточу гIалгIайн жигархочунна Мякиев Багаудина йиттина аьлла. Хаам тIечIагIбина адвокато Урусова Фатимас а. "Юьхь тIехь таммагIаш ду летта. ХIун бахьанашца хилла инцидент цкъачунна хууш дац тхуна, карарчу хенахь СИЗО-хь ву Багаудинан адвокат. Иза араваьллачул тIаьхьа кхачам боллу информаци хир ю", - аьлла Урусовас. Мякиевца солидаралла гойтуш, бисинчу лецначу жигархоша а мацалла кхайкхийна изолятор чохь. ТIечIагIбазчу хаамашца, 26 сов стага протест йина. Читать дальше...

Оьрсийоьнан Талламан комитето лехамашка велла Илаев Амхьад дIа а ца лоцуш, кхечу кепехь цунна дозанаш тохар дехна Лакхарчу Радан депутато Линько Дмитрийс а, Украинерчу бусулбачийн Ассоциацино а. Бакъонашларъярхочо Кожушко Николайс бина и хаам "Кавказ.Реалиига". Информаци бакъйина бусулбачийн ассоциацин кхеташонан декъахочо Куртбединов Зеврис а. "Тхо кхеташ ду и стаг бехке цахиларх, цундела цунна тIехIиттина тхо", - аьлла Куртбединовс. "Кавказ.Реалии" портало яздира шен агIонашкахь Илаев Украинерчу полицино дIалацарх Харьковн кIоштахь... Читать дальше...

"Маьрша Европа" Радион медиакорпорацино (РСЕ/РС) кхайкхамбина Оьрсийчоьно гIо латточу сепаратисташка, 2017-чу шарахь дуьйнна Украинан Малхбалехь бертаза лаьцна латтош волу блогер Асеев Станислав маьршаваккха аьлла. РСЕ/РС Радиона Васин Станислав аьллачу псевдонимца язъеш хилла Асеев вайна Украинерчу Донецкан кIоштахь 2017-чу шеран аьхка. Масех кIира даьллачул тIаьхьа дуьненаюкъарчу Amnesty International организацино хаамбира, оцу регионехь контрол латточу сепаратисташа журналист лаьцна аьлла, шайга информаци кхачарх. Читать дальше...

Дуьненаюкъарчу исламан кулинарин ассоциацино а, Азербайджанан Пачхьалкхан туризмехула йолчу агенталло а, къаьмнийн кулинарин Ассоциацино а вовшахтоьхначу конгрессехь дакъалоцуш бу 25 пачхьалкхан векалш. Оьрсийчоьнан цIарах Кремлан хилла кхачанхо, Оьрсийчуьрчу къаьмнийн кулинарийн ассоциацин президент  Беляев Виктор а, Къилбаседа Кавказерчу шеф-кхачанхойн гильдин президент Мовлатова Хадижат а ю цигахь. "Муьлххачу а къоман култураца гергарло кхачан тIера долало. Коьртаниг ду – оцу конгрессехь хIоранна а аьтто хилар, шайн къоман кхача бовзийта. Читать дальше...

Краснодаран кIоштарчу Водники эвлахь хиллачу инцидентех дийцина социалан машанашкахь Соьлжа-ГIалин мэран хьалхарчу гIовса Хаджимурадов Iийсас. Кху деношкахь Эрмалойчуьра а, Нохчийчуьра а бахархой вовшахлетта цигахь. Цу тасадаларшкахь лазийначо бохучунна тIе а тевжина, дуьйцу Хаджимурадовс, кегийрхой туькана баьхкича муьлш бу ца хуучу наха питана а дина, леттера аьлла. Хьалхо интернетехь Iораяьккхинчу аудио тIехь цхьахволчу нохчочо орца доьхура махкахошка, шайна юха а тIелатахь а бохуш. Цо бахарехь, 30-40 стаг хилла кхарна тIелеттарг. Читать дальше...

Автотранспорто хIаваъ бехдечу гIаланийн тептарехь ю Оьрсийчоьнан Новосибирск, Красноярск, Омск гIаланаш. Рейтинг зорбане даьккхина Iалам Iалашдархойн Гринпис юкъаралло. Стохка Мангал-баттахь дIабуьйлабелла кху шеран Стигалкъекъа-батте кхаччалц зераш дина экологаша оьрсийн гIаланашкахь азотан диоксидца хIаваъ бехдарх. Хьалхарчу могIарехь дIатаръелла Москва, цунна тIаьхьа ю Санкт-Петербург а, Челябинск а. 4-чу меттигехь билгалъяьккхина Новосибирск, пхоьалгIа Красноярск. 10-гIа ю аьлла, къастийна Омск гIала. Читать дальше...

Дагестанерчу Карабудахкентан кIоштарчу Уллубийаул эвлахь охьадогIучу хино такхийна ши зуда а, ши бер а. "Уьш кIелхьарбохуш операци йолийнера оцу сохьта, делахь а аьтто ца баьлла уьш дийна хичуьра хьалабаха. Тахана Iуьранна карийна церан декъий", - аьлла, дийцина "Кавказ.Реалии" портале республикерчу орцан министраллан пресс-гIуллакххоша. Аьхке йолаелчхьана Дагестанехь верриг а хичу вахана исс стаг, шайлахь диъ бер а долуш. Лийча йихкина меттигаш бахархоша цаларъяр ду аьлла орцанхоша, хи тIехь нах баларан коьрта бахьана.

Нохчийн пачхьалкхан "Грозный" телеканалан эфирехь лерина репортаж гайтина нохчийн йоьIан Сугаипова Заирин кхолламех. Бакъонашларъярхоша чIагIдарехь, Москварчу "Китеж" кризисан центрера цуьнан гергарчара Iеха а йина, Нохчийчу дIайигина иза, бертаза маре яхийта. Сюжетехь гойтуш ду Нохчийчоьнан куьйгалхочун Кадыров Рамзанан пресс-секретаран а, "Грозный" телехьожийлан директоран Дудаев Ахьмадан а йоIаца Сугаипова Заирица а, цуьнан ненаца Маликица а хилла къамел. Репортажехь Заирас бакъдо, ша цIера ядар. Читать дальше...

Нохчийчуьра схьаваьлла 25 шо долу Хаюрин Мухьаммад-Iела а хила тарло Новосибирскан мэран харжамийн кандидаташлахь аьлла, хаамбо «Ваш город» портало. ТIехьа-Мартанахь вина ву Хаюрин. Карарчу хенахь Бумматарчу адресца дIаязвина ву иза. Новосибирскан пачхьалкхан университет чекхъяьккхина цо, тIаьххьарчу заманчохь гIишлошъяран фирман куьйгалхо ву иза. "Партия возрождения села" цIе йолчу боламо гIолаьцна цунна Новосибирскан мэран дарж къовсуш. Порталан информацица, кандидаташлахь тIаьххьара кехаташ чуделларг ву Хаюрин. Читать дальше...