Алексей Песошин: Өлешләп төзелештә алданучылар проблемасын тулысынча хәл итү ниятләнә
(Казан, 23 апрель, «Татар-информ», Гөлнар Гарифуллина). ТР Премьер-министры Алексей Песошин әйтүенчә, өлешләп төзелештә алданучылар проблемасын быел тулысынча ябу ниятләнә. Бу минутларда Хөкүмәт җитәкчесе алтынчы чакырылыш Татарстан Дәүләт Советының 21 нче утырышында 2020 елда республиканың башкарма хакимият органнары эше турында хисап белән чыгыш ясый. «Өлешләп төзелешкә караган объектларны файдалануга кертү буенча системалы эшне дәвам итәбез», — диде Хөкүмәт рәисе. 2020 елда өлешләп төзелештә катнашкан 398 кеше өчен 7 объект кулланышка тапшырылган. «Хәзер 2,5 мең өлешче үз акчасын керткән 13 объект эшләп бетерү стадиясендә. Быел өлешләп төзелештә алданучылар проблемасын тулысынча ябарбыз дип планлаштырабыз», — диде Алексей Песошин.