Песошин белән Россельхозбанк вәкиле агросәнәгать комплексын үстерү турында сөйләште
(Казан, 14 апрель, «Татар-информ»). Татарстан Премьер-министры Алексей Песошин Россельхозбанк идарәсе рәисе урынбасары Денис Константинов белән очрашты. Чарада авыл хуҗалыгы проектларын финанслау һәм республиканың агросәнәгать комплексын үстерү турында фикер алыштылар.
Татарстан Президенты матбугат хезмәте хәбәр иткәнчә, очрашу Татарстан Хөкүмәте йортында узды. Алар авыл хуҗалыгы товар җитештерүчеләренә ярдәм итү темасын да кузгатты.
Чарада шулай ук Татарстан Премьер-министры урынбасары — Татарстан авыл хуҗалыгы һәм азык-төлек министры Марат Җәббаров һәм Татарстан төзелеш, архитектура һәм торак-коммуналь хуҗалык министры Марат Айзатуллин катнашты.