Даҳҳо сар чорво аз Кокули Фархор куҷо "ғайб" зад? ВИДЕО
Даҳҳо сар чорвои сокинон дар деҳаи Кокули ҷамоати Ғалабаи ноҳияи Фархор -- минтақаи ҳаммарз бо вилояти Тахори Афғонистон, бенишон шудааст. Ба қавли сокинон, нопадидшавии сартосарии чорвои сокинон тӯли як моҳи ахир иттифоқ афтодааст. Онҳо тахмин мезананд, ки шояд чорвояшонро ба он сӯи марзи Афғонистон бурдаанд. Мақомот дар Фархор мегӯянд, ки ҳолати пешомадаро таҳқиқ доранд.
Фақат дар як шаб 5 гови Гулбаҳор Ораева, сокини деҳаи Кокул аз чарогощи атрофи деҳа "ғайб" задааст. Ин сокини Фархор мегӯяд, "бегоҳ рафтем, ки говҳо нест, барои чаро бурда будем. Аз ҳамонҷо бегоҳ гум шуд. Саҳар то бегоҳ кофтем, пайдо накардем. Боз саҳар рафтем, шунидем, ки 3 аспи дигар ҳам гум шудааст".
Гумшавии сартосарии чорво, сокинони деҳаи Кокулро шигифтзада кардааст. Аксари онҳо мегӯянд, ҷустуҷӯи чорво ҳеҷ натиҷае надодааст ва барои пайдо кардан ба мақомот муроҷиат кардаанд.
Ба гуфтаи Ғалатой Холова, сокини деҳаи Кокул, дар се моҳ 11 говаш гум шуд ва ҳафтаи пеш 13-тои дигар "ғайб" зад. Ӯ мегӯяд, ки танҳо як говашро пайдо кард, ки он ҳар дар дохили хати марз буд.
Даромади аслии сокинони деҳаи Кокул аз чорвопарварӣ аст ва ҳоло теъдоде аз онҳо ба таври комил аз ин манбаи даромад маҳрум шуданд.
Ҳамин тавр, шаш гови Гулбаҳор Давлатова, сокини деҳаи Кокул низ ба таври асроромез нопадид шудааст. Ӯ мегӯяд, "рӯзи 5-уми декабр соати 6-и саҳар гови калони ширдеҳам гум шуд. Модагове, ки ман зиндагиамро аз пушти он мегузаронидам, намедонам куҷо шуд. Ҳамон одамҳое, ки говҳои онҳо ҳам нопадид шуд, мегӯянд, тарафи Афғонистон бурдаанд. Симхорҳои буридаро диданд, афғонҳоро диданд. Рӯзи 1-уми январ боз 2 гови дигарамро бурданд".
Сокинон мегӯянд, дар ин робита чанд дафъа ба мақомоти интизомии ноҳия муроҷиат кардаанд, аммо ба гуфтаи онҳо, мақомот ҳанӯз дар пайи таҳқиқ нашудаанд. Иддаое, ки раиси ноҳияи Фархор онро рад мекунад. Рустам Раҳматзода, раиси ноҳияи Фархор мегӯяд, "мақомот кор карда истодаанд ва чизе ба даст омад, ба иттилои матбуот мерасонем".
Ба гуфтаи сокинон, тӯли бештар аз як моҳ ҳудуди 100 сар чорво аз деҳаи Кокул рабуда шуданд. Ҳароси онҳо бештар аз он аст, ки чорвояшонро аз дохили манзил, аз оғилхонаҳо мерабоянд. Ва мутмаинанд, ки ин ҳодисаҳо тасодуфӣ нест, зеро осори дуздии сартосариро ошкоро эҳсос кардаанд.