Дар Тошканд мурофиаи нави Гулнора Каримова шуруъ шуд
Дар шаҳри Тошканд мурофиаи нави додгоҳии Гулнора Каримова, духтари президенти пешини Узбекистон Ислом Каримов, шуруъ шудааст. Каримова аз моҳи марти соли гузашта ба ин сӯ дар зиндони занона ба сар мебарад.
Додгоҳи олии Узбекистон бо пахши изҳороте тавассути шабакаи «Телеграм» навишт, додгоҳи “Каримова ва дигарон” рӯзи 8-уми январ оғоз шуд. Дафтари матбуоти Додситонии кулли Узбекистон гуфт, моҳи август Каримова дар хариди ғайриқонунии саҳмияҳои ду корхонаи сементбарорӣ муттаҳам шуд. Ӯ баъдан саҳмияҳоро ба соҳибкорони хориҷӣ фурӯхт.
Гулнора Каримова, ки соли 2015 бо гуноҳи азхудкунӣ ва исрофкории маблағҳо ба панҷ соли ҳабс маҳкум шуда, ҳукмро дар ҳабси хонагӣ паси сар мекард, моҳи марти соли 2018 дар зиндони занонаи канори Тошканд ҷойгир крада шуд. Мақомот гуфттанд, ки ӯ муқаррароти ҳабси хонагиро поймол кардааст.
Додситонҳо гуфтанд, ният доранд 1,5 миллиард доллар дороиҳои азхудкардаи Каримоваро аз хориҷа баргардонанд. Маълум нест, оё худи Гулнора Каримова дар додгоҳ иштирок мекунад ё на ва мавқеи ӯ ба ин иттиҳомот чӣ аст. Наздиконаш гуфтанд, ба вакилони дифое, ки аз ҷониби Имон Каримова, духтари Гулнора Каримова, ҷалб шудаанд, ошкор кардани ҷараёни мурофиа ба ҷомеа ва матбуот манъ шудааст.
Гулнора Каримова, ки замони зинда будани падараш бо фаъолиятҳои тиҷоративу ҷамъиятиаш машҳур буд ва замоне ӯро президенти ояндаи Узбекистон мегуфтанд, дар солҳои охири зиндагии Ислом Каримов ба ҳабс гирифта шуд. Вай аз соли 2014 боз дар шароити ҳабс ба сар мебарад.
Ислом Каримов аз соли 1989 то 2016 бо панҷаи оҳанин Узбекистонро раҳбарӣ кардааст.
Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10