Qindra të arrestuar për keqpërdorim të dyshuar të fëmijëve në pornografi
Mbi 300 njerëz u arrestuan pas mbylljes së një prej "ueb-faqeve më të mëdha në botë për pornografi të fëmijëve", thanë hetuesit britanikë.
Ueb-faqja ka pasur mbi 200,000 video, të cilat janë shkarkuar më shumë se një milion herë.
Ajo është mbyllur vitin e kaluar, pasi autoritetet në Mbretërinë e Bashkuar kanë zbuluar ekzistencën e saj.
Por, të mërkurën, zyrtarët britanikë njoftuan se 337 përdorues të dyshuar janë arrestuar në 38 vende.
Agjencia Kombëtare për Krim në Mbretërinë e Bashkuar tha se arrestimet, mes tjerash, janë bërë në Britani, Irlandë, Amerikë, Kore të Jugut, Gjermani, Spanjë, Arabi Saudite, Emirate të Bashkuara Arabe, Çeki dhe Kanada.
Pronari i ueb-faqes, Jong Woo Son, 23 vjeç, aktualisht ndodhet në burg në Korenë e Jugut.
Ueb-faqja, e quajtur Welcome to Video, drejtohej nga Koreja e Jugut dhe kishte gati tetë terabajt përmbajtje.
Prokurorët thanë se faqja ka ofruar video të akteve seksuale që përfshinin fëmijë, foshnje dhe të vegjël dhe u ka kërkuar përdoruesve të mos ngarkonin video që paraqesin pornografi vetëm për të rriturit.
Ueb-faqja është mbyllur nga një task forcë ndërkombëtare - që përfshinte agjenci nga Mbretëria e Bashkuar, SHBA-ja, Koreja e Jugut dhe Gjermania - pasi ka operuar për tre vjet.
Lexoni edhe këtë:
YouTube gjobitet me 170 milionë dollarë në SHBA