اشرف غني: د طالبانو او د هغوی د ملاتړو مقابلې ته اماده یو
محمد اشرف غني په ازبکستان کې د منځنۍ او جنوبي اسیا د سیمهییز اتصال غونډې ته خبرو کې اعلان وکړ چې افغان حکومت د طالبانو مقابلې ته چمتو دی.
د ښاغلي غني په خبره، که څه هم پاکستان ژمنه کړې چې طالبان د سولې خبرو ته حاضروي، خو طالبان اوس د خبرو پر ځای غواړي د جګړې له لارې واک ترلاسه کړي.
ښاغلي غني ټینګار وکړ چې طالبان هېڅکله نهشي کولای د زور له لارې واک ترلاسه کړي.
محمد اشرف غني وايي: "موږ د طالبانو او د هغوی د ملاتړو مقابلې ته تر هغې اماده یو چې دوی په دې حقیقت پوه شي چې د وړاندې تګ او همداراز د روانې کشالې یوازنۍ حل لاره خبرې اترې دي، نو له همدې کبله په طالبانو غږ کوو چې له افغان حکومت سره د سولې په خبرو کې ښکېل شي، جګړې او ویجاړۍ ته د پای ټکی کېږدي، همداراز په پاکستان هم غږ کوو چې له خپل نفوذه په استفادې په افغان سوله کې مهم رول ولوبوي."
جمهور رئیس د خپلې وینا په یوې برخه کې وویل، د استخباراتي معلوماتو پر بنسټ په تېره یوه میاشت کې ۱۰ زره جنګیالي د جګړې لپاره له پاکستان افغانستان ته راغلي دي.
هغه همداراز د پاکستان اړیکو ته په اشارې سره وویل، که څه هم پاکستان تل د وسلهوالو طالبانو د ملاتړ خبره رد کړې، خو اوس شواهد دا ښیي چې د دوی په خاوره کې وسلهوال پټنځایونه لري.
افغان ولسمشر تمه وښوده چې افغان ځواکونه کولای شي روان حالت کابو کړي.
ښاغلی غني زیاتوي: "موږ د الله پاک په نصرت او د خپلې وطنپالنې له مخې باور لرو چې کولای شو ننګونې په فرصتونو بدلې کړو."
جمهور رئیس د ازبکستان د منځنۍ او لوېدیځې اسیا د سیمهییز اتصال په نړیوال کنفرانس کې د هند، امریکا او د پاکستان له لوړپوړو چارواکو سره هم لیدلي.
د جمهوري ریاست له لوري په خپره شوې خبرپاڼه کې ويل شوي چې جمهور رئیس نن د پاکستان له صدراعظم عمران خان سره لیدلي او دواړو خواوو په مهمو مسایلو خبرې کړي.