چارواکي: د افغانستان په شمال لوېديځ زون کې ۱۳ وسله وال وژل شوي
دا خبره ۲۰۹ شاهین قول اردو په يوه اعلامیه کې کړې ده.
اعلامیه وايي، د وليد څلوېښت عملیاتو په نتيجه کې د بلخ ولایت پل بنګاله، بابه قشقار، قندهاري او د چمتال ولسوالۍ مرکز د سخت دريځو له شتونه پاک شوي او په دې عملیاتو کې شپږ وسله وال وژل شوي او څلور نور ټپیان شوي دي.
اعلامیه وايي، په دغو عملیاتو کې امنيتي ځواکونو ته هېڅ زیان نه دی رسېدلی.
همداراز د اعلاميې په وينا، د کندز ولایت په امام صاحب ولسوالۍ کې د امنیتي ځواکونو او وسله والو طالبانو تر منځ په نښته کې شپږ سخت دريځي وژل شوي او پنځه نور ټپيان شوي او همداراز د علي اباد او کندز پر لویه لاره له امنیتي ځواکونو سره په نښته کې یو طالب وسله وال وژل شوی دی.
اعلاميه زیاتوي چې پرون ماښام د بغلان- سمنګان پر لویه لاره د امنيتي ځواکونو پر پوسته سخت دريځو تهاجمي حمله وکړه چې بېرته پر شا وتمبول شوه.
اعلامیه وايي، په دغو نښتو کې ملکي وګړو ته مرګ ژوبله نه ده اوښتې.
په دې اړه څه نه دي ويل شوي چې امنیتي ځواکونو ته تلفات اوښتي که نه.
وسله والو طالبانو په دې اړه تر اوسه رسنیو ته څه نه دي ويلي.