افغانستان له فلسطیني کډوالو سره یو ميلیون ډالر مرسته وکړه
د ترکيې د بهرنیو چارو وزارت وویل، دغه مرسته په ترکیه کې د افغانستان سفیر عبدالرحیم سیدجان نن یکشنبه په استانبول کې د یولړ مراسمو په ترڅ کې د ملګرو ملتونو د بشري مرستو او د کارادارې کمیشنر UNRWA پیري کریهنبول ته وسپارله.
د ترکیې د بهرنیو چارو وزارت چې دغه مراسم یې تنظیم کړي وو، د افغانستان د مرستې ستاینه وکړه.
د ترکیې د بهرنیو چارو وزیر مولود چاوش اوغلو وویل، که څه هم افغانان پخپله له سختو کړاوونو سره مخامخ دي، خو هېواد یې په دغه سپېڅلي عمل سره د نړیوالې ورورګلوۍ یو تر ټولو ښه مثال په ډاګه کړ.
هغه زیاته کړه چې د ملګرو ملتونو دغه اداره نورو مرستو ته هم اړتیا لري او ژمنه یې وکړه چې ترکیه به له فلسطینیانو سره مرستې زیاتې کړي.
د تېر کال په اګست کې د ټرمپ ادارې له دغې ادارې سره د امریکا د مرستو د بندولو اعلان وکړ.