اسرائیل نن د هغې غونډې کوربه دی چې پولنډ ترې ډډه کړې
د پولنډ صدراعظم ماتاویش موراویسکي د خپل هېواد رسنیو ته ویلي چې د اسرائیل د بهرنیو چارو د سرپرست وزیر د وروستیو له تعصبه ډکو څرګندونو په خاطر چې هغه د نه منلو وړ دي، په دې غونډه کې ګډون نه کوي او نه به یې هم د بهرنیو چارو وزیر پکې برخه واخلي.
د اسرائیل د بهرنیو چارو سرپرست وزیر اسرائیل کاتس په یوه ټلویزیوني مرکه کې ویلي چې ډېری پولنډیان په دوهمه نړیواله جګړه کې د جرمني له نازیانو سره همکار وو.
د پولنډ د بهرنیو چارو وزارت د دغو څرګندونو په غبرګون کې په وارسا کې د اسرائیل سفیر هم احضار کړی و.
له دې مخکې د اسرائیل صدراعظم بنیامین نتانیاهو په وارسا کې د منځني ختیځ په اړه کنفرانس کې ورته څرګندونې کړې وې.
د اسرائیل د بهرنیو چارو وزرات ویاند ایمانوئل نهشون په یوه بیان کې ویلي چې له پولنډ پرته د نورو درې هېوادونو صدراعظمان ورځي او د اسرائیل صدراعظم به په دې غونډه کې ګډون وکړي.