د ناټو ۲۹ غړو له دغه تړون سره د مقدونیې د یو ځای کېدو موافقه وکړه
د مقدونیې د بهرنیو چارو وزیر نیکولا دیمیتروف او د ناټو د ۲۹ غړو استازو دا هوکړه لیک امضا کړ.
د ناټو سرمنشي ینس سټولټنبرګ نن په بروکسل کې د دې سند ترلاسلیک وروسته خبریالانو ته وویل:
"د ناټو غړي به تاسو ته په شمالي اتلانتیک شورا کې یوه څوکۍ درکړي، تاسو به په هغو پرېکړو کې چې موږ یې د متحدینو په توګه کوو، برابر ځای ولرئ، تاسو له وړاندې زموږ په مشترکو امنیتي چارو کې همکاري کړې ده، د افغانستان په ماموریت او په جنوب ختیځې اروپا کې د سیمه يیزې همکارۍ د ودې لپاره موږ مهم رول ادا کړی او دغه راز مو لوی اصلاحات راوستي دي."
دا امکان وروسته له هغه رامنځته شو چې مقدونیې او یونان په خپلو کې یوه تاریخي لانجه چې د نوم په اړه یې درلوده، حل کړه.
د یونان په شمال کې یوه سیمه د مقدونیې په نوم ده چې له کبله یې دواړو هېوادونو د نوم د بدلولو په اړه اختلافات درلودل.
همدې اختلافاتو له اروپایې ټولني سره د مقدونیې د یوځای کېدو پر وړاندې خنډ رامنځته کړی و.
د دواړو هېوادونو ترمنځ د تفاهم له مخې مقدونیې خپل نوم په شمالي مقدونیې بدل کړ.