د هنګري ولسمشر د کارګرانو اړوند یو لانجمن قانون توشیح کړ
ولسمشر یانوش ادر «Janos Ader» په خبرپاڼه کې استدلال کړی دی چې د کارګرانو په قانون کې اصلاحات او د هغه مقررات له اساسي قانون سره په ټکر کې نهدي.
د نوي قانون له مخې د کارګرانو د اضافه کارۍ د ساعتونو شمېر له ۲۵۰ ساعتونو څخه ۴۰۰ ته لوړېږي، خو تنخواګانې یې تر درېیو کلونو پوې ځنډېدلی شي.
ولسمشر ادر چې د صدراعظم ویکتور اوربان له متحدانو څخه دی ویلي چې نوي مقررات د اروپايي ټولنې د نورو غړو هېوادونو د کارګرانو د اضافه کارۍ له وختونو سره یوشان دي.
دا قانون وروسته له هغه توشیح کېږي چې د اپوزیسیون ډلو له تېرو څو ورځو راهیسې اعتراضونه پیل کړي دي او دا قانون یې د مرییتوب «غلامۍ» قانون بللی دی.
اپوزیسیون نن ماښام هم په پلازمېنه بوداپست کې اعتراضونه پلان کړې دي.
کارګري ټولنو ګواښ کړی چې که ولسمشر ادر د دې اصلاحاتو عملي کولو ته دوام ورکړي نو په عمومي اعتصاب به لاس پورې کړي.