Мәктәп укучыларына кечкенә төркемнәр белән музейларга йөрергә рөхсәт иттеләр
(Казан, 2 март, «Татар-информ»). Тиешле куркынычсызлык чараларын үтәгәндә федераль музейлар 25-30 кешелек мәктәп укучылары төркемнәрен кабул итә алачак. Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) тиешле хаты Россия Мәдәният министрлыгына тапшырылды, дип җиткерә ведомствоның матбугат хезмәте. Элегрәк хәбәр ителгәнчә, Роспотребнадзор белем бирү программалары кысаларында мәктәп сыйныфларында музейларга бару мөмкинлеген килештергән иде. «Россия Мәдәният министрлыгы башлыгы ведомство карамагындагы музейларга Кулланучы хокукларын яклау һәм кеше иминлеге өлкәсендә күзәтчелек федераль хезмәте белән агарту-белем бирү программалары кысаларында мәктәп сыйныфларының музейларга бару мөмкинлеген килештерү турында мәгълүмат бирде. Роспотребнадзорның тиешле хаты Мәдәният министрлыгына килде», диелә матбугат хезмәте хәбәрендә. Укучылар төркемнәренең 25-30 кешедән торуы ачыклана. Кулланучы хокукларын яклау һәм кеше иминлеге өлкәсендә күзәтчелек федераль хезмәте тарафыннан тәкъдим ителгән профилактика чараларын үтәгәндә укучыларны кабул итәргә рөхсәт ителә. Бер төркемгә бер сыйныф укучылары керергә тиеш, дип искәртәләр ведомствода.