Чирмешән районында бер атнада ике янгын булган
(Казан, 8 июль, «Татар-информ», « Безнең Чирмешән», Марат Гомәров). 1 июль көнне Чирмешәндә абзар янса, 3 июльдә ут Лашман авылында торак йортка зыян сала. Бу хакта район газетасы яза.
Райондагы бердәм диспетчерлык хезмәтеннән хәбәр итүләренчә, район үзәгендәге Октябрь урамында чыккан ут казасы хакында янгын сүндерүчеләргә кичке бишенче яртылар тирәсендә телефоннан шалтыратып әйтәләр. Алар килгәндә, блоктан төзелгән, шифер түбәле абзар ут эчендә була, түбә янып бетә. Хәзер әлеге янгынның сәбәпләре ачыклана, диелә хәбәрдә.
Лашмандагы янгын исә көнкүреш электр җиһазларыннан чыккан, ди белгечләр. Бурадан төзелгән, блок янкормалы өйгә зыян зур булса да, янгында, шөкер, кешеләр сәламәтлегенә зыян килмәгән.