Шумори қурбониёни коронавирус дар Эрон ба беш аз 2500 тан расид
Мақомоти Эрон хабар доданд, ки рӯзи 28-уми март 139 нафари дигар бар асари олудагӣ ба коронавирус ҷон бохтанд. Бо ин рақам, шумори қурбониёни коронавирус дар Эрон ба беш аз 2500 тан расид.
Киёнуш Ҷаҳонпур, сухангӯи Вазорати тандурустии Эрон, рӯзи шанбе гуфт, дар 24 соати гузашта беш аз 3 ҳазор мавриди гирифторӣ ба бемории ҳамагири КОВИД-19 дар ин кишвар сабт шуд.
Шумори умумии мубталоён ба КОВИД-19 дар Эрон ба беш аз 35 ҳазор нафар мерасад.
Ин дар ҳолест, ки Ҳасани Рӯҳонӣ, раиси ҷумҳурии Эрон, ваъда додааст, мақомҳои ин кишвар тайи ду ҳафта пеши роҳи густариши коронавирусро хоҳанд гирифт.