Яғноб минтақаи сайёҳӣ мешавад
Бунёди "Порки Яғноб" (Порки табии миллии Яғноб) дар 150-километрии шимоли Душанбе ин минтақаи таърихию бостонӣ ва дастнорасро барои ҷомеаи ҷаҳонӣ дастрас ва шароитро барои сайёҳони хориҷӣ фароҳам месозад.
Тавре аз Оҷонсии ҷангали Тоҷикистон ба Радиои Озодӣ гуфтанд, ҳукумати кишвар бо содир кардани як қарори расмӣ бо имзои Эмомалӣ Раҳмон, аз ин ниҳод ва Кумитаи давлатии идораи замин ва геодезӣ тақозо намудааст, ки дар фурсати наздик қитъаи "Порки Яғноб"-ро дар мавзеи Яғноб мушаххас намуда, сарфу харҷи онро ба ҳукумат пешниҳод кунад.
Дар ин қарор аз ҷумла зикр шудааст, ки "Парки Яғноб" аз ҳисоби заминҳои давлатӣ ва мавзеъҳои минтақаи Яғноб, ки дар тобеияти ноҳияи Айнӣ мебошад, ташкил шавад. Ин бори аввал аст, ки минтақаи Яғноб ба унвони як гӯшаи бостониву фарҳангӣ ва экологии Тоҷикистон, мавриди таваҷҷуҳи мақомоти кишвар қарор мегирад.
Аз дафтари матбуоти Оҷонсии ҷангал рӯзи 30-уми май ба Радиои Озодӣ гуфтанд, ки ҳадаф аз ин иқдом, ҳифзи мероси фарҳангӣ, кашфи гӯшаҳои бостоншиносӣ, рушди сайёҳӣ ва пешбурди корҳои иктишофиву илмӣ, мебошад.
Дар ҳоли ҳозир роҳи мошингард то минтақаи Яғноб вуҷуд надорад ва давоми сол ҳамагӣ 5 моҳ имкони роҳ ёфтан ба Яғноб имконпазир мешавад. Дар ҳоли ҳозир дар 13 деҳаи ин минтақа ҳамагӣ 500 нафар зиндагӣ мекунанд ва як мактаби чорсола фаъол аст.
Минтақаи Яғноб ҳанӯз аз даврони шӯравӣ дар тобеияти ноҳияи Айнӣ аст ва бо вуҷуди мушкилгузар будани роҳи он, бархе бостоншиносон ва сайёҳон барои ошноӣ бо забони яғнобӣ ҳамчун як шохаи зиндаи забонӣ суғдӣ, ба ин минтақа сафар мекунанд.
Яғнобшиноси тоҷик Сайфиддин Мирзоев, корманди илмии Пажӯҳишгоҳи забон ва адабиёти ба номи Рӯдакӣ мегӯяд, забони яғнобӣ як шохаи забони зиндаи суғдӣ ба шумор меояд ва муҳаққиқони хориҷӣ ва сайёҳон ҳамеша талош мекунанд ба ин минтақа сафар кунанд. Президенти Тоҷикистон Эмомалӣ Раҳмон бори аввал 8 сол қабл барои шиносоӣ бо вазъи зиндагии мардум бо чархбол ба Яғноб сафар карда буд.
Тавре Оҷонсии ҷангали Тоҷикистон мегӯяд, бо боз шудани роҳи мошингард то Яғноб дар миёнаҳои моҳи июн, намояндагони мақомоти ҳукумати кишвар барои муаррифии ин барнома ба Яғноб сафар хоҳанд кард. Дар назар аст бар асоси барномаи мазкур дар Яғноб чаҳор порки миллӣ бунёд карда шавад.
Қаблан дар Яғноб 32 деҳа вуҷуд дошт, вале мардуми он ба ноҳияи Зафаробод, Варзоб ва атрофи Душанбе кӯч дода шуданд.