Kosovë: 28 viktima dhe mbi 25 mijë raste aktive
Sipas raportit, 14 nga viktimat ishin të gjinisë femrore dhe 14 të gjinisë mashkullore.
Tetë viktima ishin të grupmoshës 60-69 vjeç, 7 i përkisin grupmoshës 70-79 vjeç, 6 në grupmoshën 50-59. Ndërkaq, 5 viktima i përkisnin grupmoshës mbi 80 vjeç. Nga një viktimë u shënua në grupmoshat 20-29 dhe 40-49 vjeç.
Ministria e Shëndetësisë në raportin ditor për situatën epidemiologjisë thotë se janë shënuar edhe 489 raste të reja të të infektuarve me koronavirus.
Shifra bazohet në 6.310 mostra të testuara në laboratorët publikë dhe privatë.
Llogaritur në përqindje del se 7.7 për qind e të testuarve kanë rezultuar pozitivë.
Sëmundjen e kanë mundur edhe 859 qytetarë, derisa raste aktive janë 25.290.
Më herët, Shërbimi Spitalor dhe Klinik Universitar i Kosovës (SHSKUK) njoftoi se tetëdhjetë e tre pacientë me koronavirus, të shtrirë në spitalet e Kosovës, janë në gjendje të rëndë. Një ditë më herët, numri i pacientëve në gjendje të rëndë ishte 87.
Në total, në spitalet e Kosovës janë 1,115 pacientë pozitivë me koronavirus.
Sipas njoftimit të SHSKUK-së, 1,038 prej tyre janë duke u trajtuar me oksigjenoterapi.
Numrin më të madh të pacientëve me koronavirus e ka Qendra Klinike Universitare e Kosovës: 431.
Numri i qytetarëve të Kosovës të vaksinuar me nga dy doza të vaksinës kundër koronavirusit ka arritur në 315.880.