ايراني رسنيو د 'مجيد رضا رهنورد' د اعدام خبر ورکړی دی
دغه خبري اژانس پر خپله وېبپاڼه لیکلي چې مجیدرضا رهنورد په مهشد کې په عام محضر کې په دار راځړول شوی دی.
د ایران د قضاییه قوې خبري اژانس د مجید رهنورد تور د اعتراضونو په لړ کې د مشهد په حر عاملي واټ کې په چاړه د دوو بیسجیانو، چې حسین زینال زاده او دانیال رضازاده نومېږي، وژل یاد کړی دی.
نوموړی ۲۳ ورځې مخکې نیول شوی و او له نیولو ۵ ورځې وروسته د مشهد څارنوالۍ رسماً تورن او دوسیه ورته جوړه کړه.
د ده دوسیه سمدستي د مشهد انقلابي محکمې ته واستول شوه او ۵ ورځې وروسته د مشهد انقلابي محکمې، بې له دې چې ده ته د مدافع وکیل فرصت ورکړي، په اعدام محکوم کړ.
د رضوي خراسان ولایت، چې مشهد یې مرکز دی، د عدلیې عمومي رئیس غلام علي صادقي د اعدام د حکم له تطبیقه وروسته وویل، رهنورد د نظم او امنیت د ټینګښت، د قانون ماتونکو او بلواګرو د ځپلو په خاطر اعدام شو.
خو د بشري حقونو فعالانو د محاکمې پروسه ناعادلانه بللې او ویلي چې، تورن ته حتی د مدافع وکیل د غوره کولو وخت نهدی ورکړای شوی.
د بشري حقونو وکیل سعید دهقان د مجیدرضا رهنورد اعدام «حکومتي اعدام» وباله.
ده پر خپله ټویټرپاڼه کښلي: "دا اعدام نه بلکې حکومتي قتل دی ځکه چې هم شکایت کوونکی حکومت و، هم قاضي او هم وکیل."
تر دې وړاندې محسن شکاري د یوه سړک د بندولو او د یوه بسیجي د ټپي کولو په تور اعدام شو.
د شکاري پر اعدام هم په ایران او نړۍ کې ډېر اعتراضونه وشول.
د ایران د حکومت له لوري د اعتراض کوونکو له اعدامونو اونیونو سره سره د اعتراضونو لړۍ دوام لري.
تېره شپه هم د تهران په ستارخان سیمه کې د محسن شکاري د اعدام په اعتراض کې مظاهرې وشوې.
ستار خان هغه سیمه ده چې شکاري پهکې نیول شوی و.