د سلواکیا پولیس دغلته د څو ورکو افغان نجونو د موندلو لټه کوي
۳۵ کسیز افغاني ارکستر د شنبې په ورځ د جولای په ۱۳مه د چک جمهوریت پولې ته نږدې د سلواکیا په ترینڅین لوېدیځ ښارګوټي کې د پوهودا په نوم په فیسټوال کې موسیقي اجرا کړه.
د سلواکیا پولیس وايي، د دې ارکستر چې زهره نومېږي، ۴ غړې د یکشنبې په ورځ له خپل هوټله بې درکه شوي دي.
د ترینڅین د سیمه ییزو پولیسو ویندوی پاول کودلیڅکا وايي چې د موسیقۍ د ارکستر غړي له کنسرته وروسته خپل هوټل ته لاړې، خو په سبا سهار یې څلور تنه ورکې شوې.
ده وویل، د دې لپاره چې څېړنې روانې دي او همداراز په قانوني دلایلو د بې درکه شویو کسانو نومونه اوس نه څرګندوي.
د سلواکیا د څو سیمه ییزو رسنیو د راپور له مخې، د دې ارکستر ځینو غړو ویلي چې د یوې د تره زوی په جرمني کې اوسي.