ایران بیا له بریتانیا وغوښتل چې د تیلو وړونکۍ کښتۍ یې خوشې کړي
دغه ایراني کښتۍ تېره اونۍ په جبل الطارق کې د بریتانیا د شاهي سمندري ځواکونو لهخوا سوریې ته د تیلو د انتقال په شک ونیول شوه.
اروپایې ټولنې سوریې ته د تیلو پر لیږد بندیز لګولی دی.
د ایران دولتي خبري آژانس ایرنا د راپور له مخې د دغه هېواد د بهرنیو چارو وزارت ویاند عباس موسوي نن وویل چې د ایراني تیل وړونکۍ کښتۍ نیول یوه خطرناکه لوبه ده او پایلې به ولري.
موسوي همدا راز ویلي چې پهدې برخه کې حقوقي پلمې د منلو نهدي او د دې کښتۍ خوشې کېدل د ټولو هېوادونو په ګټه دي.
تهران تردې وړاندې هم خبرداری ورکړی و چې که دا کښتۍ خوشې نهشي متقابل اقدام به وکړي.
د ایران د بهرنیو چارو د وزارت ویاند دا هم ویلي چې بهرني قدرتونه دې له سیمې ووځي ځکه د ده په خبره ایران او نور سیمهییز هېوادونه د خپل امنیت د ساتلو وړتیا لري.
په همدې حال کې د بریتانیا د بهرنیو چارو وزیر جرمي هنټ ویلي چې هېواد یې له ایران سره شخړه نه غواړي.
بریتانیا د پنجشنبې په ورځ وویل چې درېیو ایراني کښتیو په هُرمز تنګي کې د یوې بریتانوۍ تیل وړونکۍ کښتي د درولو هڅه وکړه، خو ایران دا تور ردوي.