د پکتیا چارواکي: سږکال به شل زره ټنه جلغوزي راټول شي
د دغه ولایت د سوداګرۍ او صنایعو خونې مشر نصیر عالمیار نن د یکشنبې په ورځ ازادي راډيو ته وویل چې تېرکال د راټول شویو جلغوزیو اندازه لس زره او پنځه سوه ټنه وه چې ډېری برخه یې بهرنیو هېوادونه ته صادره شوه.
دی وايي:
"هوا ډېره ښه ده، دلته بارانونه زیات دي او په غرونو کې هم د جلغوزیو ونې زیاتې دي، نو اټکل دا دی چې سږ کال به د جلغوزیو اندازه دوه چنده زیاته وي، یعنې په ۱۳۹۸لمریز کال کې به موږ ۲۰ زره ټنه جلغوزي ولرو."
ښاغلی عالمیار وایي، نږدې ورځو کې پهدغه ولایت کې د جلغوزیو د پروسس یو ستر مرکز هم جوړ شي چې جلغوزي به په هېواد کې دننه پروسس او د افغانستان په نوم او نښان نورو هېوادونو ته صادر شي.
د ښاغلي عالمیار په خبره، تېرکال د جنوب ختیځ په کچه ۴۰ زره ټنه جلغوزي راټول شوي وو.