د سمنګان چارواکي: ۱۸ وسلهوال ووژل شول او ۱۱یې اسیران شول
د سمنګان د والي ویاند صدیق عزیزي تېر ماښام له ازادي راډیو سره په خبرو کې پهدې اړه نور جزئیات ورکړل:
"ګډو ځواکونو په روی دوآب ولسوالۍ کې د دېره طالبانو پرضد عملیات وکړل. شاوخوا شپږ کلي له طالبانو تصفیه شول، اتلس وسلهوال یې مړه او ۱۱ کسان یې اسیران شول. دا عملیات اوس مهال پای ته رسېدلي."
د عزیزي په وینا پهدې عملیاتو کې چې د چهارشنبې په ماښام پیل شوي وو، یوه اندازه وسلې او مهمات هم افغان ځواکونو ته په لاس ورغلي دي.
د سمنګان د والي ویاند زیاته کړه چې په عملیاتو کې افغان ځواکونو ته زیان نه دی اوښتی.
طالبانو تراوسه په دې اړه څه نه دي ویلي.