اندونیزیا: نړیواله ټولنه دې له زلزله ځپلو سره مرستې وکړي

اندونیزیا نن دوشنبه له نړیوالې ټولنې وغوښتل چې په هغه ټاپو کې چې د وروستۍ زلزلې او سونامې له امله لږ تر لږه ۸۳۲ کسانو خپل ژوند له لاسه ورکړ، د ژغورنې او د لومړنیو موادو رسولو په چارو کې ورسره مرسته وکړي.


د اندونیزیا ولسمشریوکو ویدودو Joko Widodo وویل، ژغورونکي په عاجله توګه درنو وسایلو ته اړتیا لري چې د نړېدلو ودانیو تر خاورو خښتو لاندې د بند پاتې شوېو ژوندیو کسانو پسې کېندنې وکړي.


درې ورځې مخکې د ریښتر په کچه ۷،۵ درجې زلزلې او سونامي د سولاویسي ټاپو وځاپه.


د اندونیزیا ولسمشر دغه راز وویل چې سیمه د سوند موادو، برښنا او د خوراکي موادو له کمښت سره ځکه مخامخ شوې چې اکثره دوکانونه د دغه طبیعي ناورین له امله تړل شوي دي.


په عین حال کې کارګرو نن د سلګونو قربانیانو د ښخولو لپاره قبرونه وکیندل. تر ټولو زیات کسان د دې ټاپو په پاولو ښارکې وژل شوي دي.


چارواکو ویلي چې تر اوسه د دې ټاپو ډېرو سیمو ته لارې نه دي پرانېستل شوي.


سور صلیب اټکل کوي چې دغه ناورین به یو میلیون او ۶ سوه زره کسان زیانمن کړي وي.