Новости за 03.05.2018

Не може за долг од 1 денар на граѓаните да им се наплаќаат 12 илјади денари, велат организациите кои бараат измени на Законот за извршување. Бараат враќање на извршителите во рамки на судовите.

Специјалниот координатор за блискоисточниот мировен процес Николај Младенов соопшти дека изјавите на палестинскиот претседател Махмуд Абас за Евреите се неприфатливи и „длабоко вознемирувачки“. „Абас во палестинскиот парламент повтори некои антисемитски изјави, вклучувајќи ја и сугестијата дека улогата на Евреите што ја имале во општеството била причина за холокаустот“, изјави Младенов, наведувајќи дека тоа не му служи ниту на палестинскиот народ, ниту на мирот на Блискиот Исток.

Британската интернет аналитичка компанија „Кембриџ аналитика“, фирмата која се најде во центарот на скандалот поради злоупотребата на личните податоци на корисниците на Фејсбук во политички кампањи, соопшти дека ќе прогласи банкрот. Компанијата е обвинета дека ги злоупотребила личните податоци на скоро 87 милиони корисници на Фејсбук и ги споделила со нејзините политички клиенти и консултантски фирми. „Кембриџ аналитика“ соопшти дека по скандалот ги загубила сите клиенти и затоа мора да прогласи банкрот.

Сириските бунтовници го прифатиле договорот постигнат со посредство на Русија да ја напуштат територијата во близина на Хомс, трет по големина град во земјата и една од последните бунтовнички енклави во Сирија. Ова е последна во серијата капиталуции на бунтовниците во седумгодишната граѓанска војна. Претходно владините сили ја вратија контролата врз предградијата на Дамаск кои беа во рацете на милитантите на Исламската држава. Енклавата Хомс беше најнаселена зона под опсада во Сирија и таму во изминативе денови имаше жестоки битки.

Американскиот претседател Доналд Трамп решил да се повлече од нуклеарниот договор на Иран, наведува новинската агенција Ројтерс, повикувајќи се на изјави на двајца претставници на Белата куќа. Според нив, уште не е познато како ќе го стори тоа.

Шефовите на дипломатиите на Македонија и Грција Никола Димитров и Никос Коѕијас денеска и утре ќе учествуваат на квадрилатералниот состанок, на кој ќе бидат и нивните колеги од Бугарија и Албанија, Екатерина Захариева и Дитмир Бушати. Од Министерството за надворешни работи не прецизираат дали е превидена билатерална средба Димитров и Коѕијас на која би станало збор за спорот со името. Последната средба во рамки на преговарачкиот процес Димитров и Коѕијас ја имаа на 25 април во Виена, а на неа присуствуваше и медијаторот на ОН, Метју Нимиц. Читать дальше...

„Решението на спорот за името е сигурна гаранција за членство во ЕУ и НАТО, доколку продолжиме со ова темпо на имплементација на реформите. Но, она што го добиваме за возврат е многу поважно за идните генерации - мир, стабилност, економски просперитет, изјави синоќа вицепремиерот за европски прашања Бујар Османи во емисијата 24 анализа на ТВ24. Тој оцени дека односите меѓу Македонија и Грција се подобри од било кога во минатото, и сега се прават обиди за лоцирање на проблемите. „Сметам дека сме го поминале врвот на планината и одиме надолу. Читать дальше...

Во Македонија ќе биде сончево со мала до умерена облачност. Попладне ќе има извесно зголемување на облачноста и ќе има локален пороен дожд со грмежи, главно во југоисточните и северозападните делови. Ќе дува умерен ветер од југоисточен правец. Максималната температура ќе се движи од 22 до 30 степени. Во Скопје и околината слично време со температура до 29 степени.