Новости за 05.06.2019

Шина декъе а екъаелла, къийсалуш ю тахана Дагестан: мила ву, махка чалхаш а еъна, юхадIавуллуш верг, 1852-чу шарахь вийна имаман наиб Хьаьжа-Мурд я цIейоцу кхин стаг? Керла каш а даккхина, барз хIоттийна Суьйлийн эланийн шахьар лаьттинчу Хунзахан кIоштахь – ЦIелмес юьртахь. Меттигерчу жигархоша чIагIдо, шаьш къайлах Азербайджанера схьа а кхачийна, дIайоьхкинарш ю Толстой Лева шен йозанашкахь вийцинчу наибан Хьаьжа-Мурдан дегIан чалхаш, бохуш. Амма кIезиг теша Дагестанера историкаш юхадIавоьллинарг шен заманахь гоьваьлла ваьхна наиб хиларх. Читать дальше...

Украинин президент Зеленский Владимир дагахь вац Гуьржийчоьнан президент хиллачу Саакашвили Михаилана Iедалехь дарж дала. Цунах лаьцна хаам бина Брюсселехь официалан визитца волчу Зеленский. Хьалхо, Саакашвилина Украинин махкалла ша юхадаларна комментари еш, Зеленскийс билгалдаьккхира, политикан а боцуш, адамаллан сацам бара ша бинарг, цуьнгара паспорт харцонца дIадаккхина хиларна аьлла. Стигалкъекъа-беттан 29-чохь Киеве цIавирзинчу Саакашвилис дIахьедар дира, керла Украина кхулуш дакъалаца дагахь ву ша... Читать дальше...

Нохчийчохь байначеран доьзалшна 1.6 миллион евро далар тIедожийна Европерчу кхело; тIекIелдинчу цIийнан 12-чу тIегIантIера чуйоьжна зуда елла Соьлж-ГIалахь.

Нурадиловн цIарахчу Нохчийн пачхьалкхан драмин театро "Ревизор" спектакль хIоттор ю Соьлж-ГIаларчу сцени тIехь. Театран директоро Ахмадова Хьавас дийцарехь, цуьнан режиссер ву Хакишев Руслан. ТАСС агенталло бинчу хаамца, карарчу хенахь нохчийн матте йоккхуш ю Гоголь Николайн "Ревизор" пьеса.

Чехин шахьарарчу шинарийдийнан протестан акце веанера 120 000 вахархо. Оццул дукха адам дацара гулделла Чехословакехь коммунистийн Iедал карчийна Nežná revolúcia хиллачул тIаьхьа цкъа а, чIагIдо Прагерчу хаамийн гIирсаша. ГIалин юккъерчу Вацлаван майдана бевллачу наха дарж дита бохура премьер-министре Бабиш Андрейга а, цо хIоттийначу юстицин министре Бенешова Марияга а. Кхелан система караерзорна бехкедора гуламхоша Iедал. Чехехь Бенешна дуьхьал протесташ лаьтта бу ши бутт – иза бозбуанчалла лелорна кхеле озор ву аьлла... Читать дальше...

Мобилан зIенан уггар йораха йолу пакет юккъерчу барамехь 3% язйелла Оьрсийчохь. Content Review хаамийн а, налитикан а агенталло дийцарехь, цуьнан бахаьана ду роуминг дIаяккхар а, НДС олу ял тIетохар а. "Коммерсант" газето яздарехь, дIаяьккхинчу роуминган мах тIебожийна бахархошна.  Къилбаседа Кавказехь мобилан зIе язйелла 8%. Карарчу хенахь цигахь уггар йорахчу зIенах доккху 320 сом. Ткъа Оьрсийчохь уггар еза мобилан зIе ю Нохчийчохь. ШолгIачу меттехь ю ГIалгIайчоь, цул тIаьхьа ю ГIебартойн-Балкхаройчоь а, Дагестан а.

Мангалан-беттан 5-чу а, 6-чу а деношкахь даккхийн догIанаш дан а, онда мох хьакха а мегаш бу аьлла, варе бина Нохчийчуьра бахархой хенахIоттаман говзанчаша. Оцу юкъанна мох хьакхаран чехкалла хила мега 20-23 метр секундехь. И бахьана долуш, карзахдаьллачу Iаламо зенаш дан мегаш ду цхьайолчу меттигашкахь. Болчу хаамца, тоькан серий хедарна электросерло йоцуш йисаран кхерам бу цхьайолу кIошташ. Говзанчаша хьехар дина бахархошна, эшахь а аьлла, мехкадаьттан чиркхаш а, чӀурамаш а кечбе аьлла.

ТIекIелдинчу цIийнан 12-чу тIегIантIера чуйоьжна зуда елла Соьлж-ГIалахь. И бохам хилла дIабаханчу-беттан 25-чохь, хаам бо "Нохчийчоь тахана" агенталло. Шинарин дийнахь зорбанан гIирсаша хаам баржийнера, Соьлж-ГIалахь некъахьовзамехь елла зуда, бехк шайна тIера дIабаккхар Iалашонца кхалхаран бахьана хьулдан муьлш бу ца хуучу наха иза тIекъелдинчу цIийнан корехула чукхоьссина хилла аьлла. И бахьана долуш бинчу таллмо гайтина, Серноводскера яхархо 56 шо долу Хакимова Байсет чуйоьжна хилар, Соьлж-ГIалан... Читать дальше...

Марха Достучу Дийнахь керланиг, хазаниг юху бедар, мерзаниг кечдо даар. И ламаст дац цкъа а хийцалуш. Амма го тахана, заманашца дуьстича, керла битамаш а: марханаш къобалдарна шена беллачу шекаран бIелигах доккхадера бер хьалха, ткъа иза "чекх ца долу" тахана - Snickers, Mars ца йоькъучу керта дода а ца доьду бер! Хийцалуш ду дезчу дийнан хатI, дикачу агIор хийцалуш … Маршо Радион корреспондента тергалдира цхьамогIа нохчийн ярташкахь Марха Достуш.

Францерчу Страсбургехь куп тоьхначу Европерчу адамийн бакъонашкахула кхело Оьрсийчоьнан Iедалшна тIедожийна 2000-2005 шерашкахь салташа дIавигинчул тIаьхьа лар йоцуш вайначу 20 стеган гергарчарна 1 миллион 600 эзар евро ахча далар. Цу хьокъехь сацам бина Страсбургерчу кхело Мангалан-беттан 4-хь. Болчу хаамца, берриг а и нах лар йоцуш байна Нохчийчохь 2-гIа тIом боьдуш, Оьрсийчоьнан ницкъаллин структураша Iуналла дечу территори тIехь тIеман барзакъ доьхна герзаца хиллачу наха лецна дIабигинчул тIаьхьа. Читать дальше...