Новости за 06.04.2019

Хьалхо Нохчийчохь лачкъийна машен хааелла ГIебарта-Балкхаройчохь. Республикан Зольскан кIоштарчу "Малка" олучу постехь кехаташка хьовса полисхоша сацийнера 29 шо долчу Соьлжа-ГIаларчу вахархочо урхалла ден автомобиль. Машен лехамашкахь хилар гучудаьлла ницкъахошна. Полисхойн талламашца, кху шеран Зазадоккху-баттахь лачкъийна аьлла, бехкзуламан гIуллакх а диллина, лехамашка елла хилла и машен Нохчийчохь. Карарчу хенахь машенан урхалхо дIалаьцна. Талламаш болийна оцу гIуллакхна гонах, яздо гIебартойн "Регион Онлайн" хьостано.

ГIиргIазойчоьнан муфтиято кхо фетва тIеэцна шоьтадийнахь веб-машин маркетингех а, платикан операцех а, вакцинацех а. Динан урхаллан сайтехь Iорадаккхарца, лоьмар 5 йолчу фетвано доьхку ГIиргIазойчоьнан бахархошна веб-машин маркетинг лелор: шарIан барамашца йогIуш яц и бизнес. Лоьмар 6 йолчу фетвано магор дац бусулбачунна могушаллица йоьзна йоцу пластикан операци яйта. "ШарIо могуьйту дуьненчу волуш дегIаца хилла сакхт дIанисдархьама операцеш яйтар. Нагахь бух болу бахьана доцуш, хазаллина аьлла... Читать дальше...

Нальчик гIалин кхелан сацамца таламан изолятор чохь (СИЗО) вуьтуш ву ГIалгIайчуьра 8 жигархо, хаамбо "Медиазона" хьостано, адвоката Абубакаров Мохьмада динчу дIахьедар тIехь. Зуламан Кодексан 318-чу артиклца протесташкахь "Iедалхошна дуьхьалоярна" бехкебина уьш. Лецна буьтурш бу: кегийрхойн организацин куьйгалхо Хаутиев Багаудин а, протестхой Добриев Абу а, Хамхоев Гелани а, Хамхоев Мохьмад а, Мужахоев ИбрехIим а, Ажигов Адам а, Барахоев Ваха а, Осканов Iамир а. 9-гIа Дзауров Хаваж кхи а 72 сахьтана чохь вуьтуш, дIаяхйина хан.

ГIезалойчоьнан чоьхьарчу гIуллакхийн министраллан кхиазхойн гIуллакхашкахула йолчу декъо документ Iорадаьккхина, "тIех сов динна чубоьллачу, хьиджабаш лелочу доьзалех материалаш кхачае" шайга аьлла. Чоьхьарчу гIуллакхийн декъан куьйгалхочо Сабирзянова Венерас яздо, балхаца доьзна и информаци оьшуш хиларх. Ишта цо доьху, шайга кхачочу материлашкахь билгалдаккхар "маца дуьйна динехь лела буьйлабелла уьш, мича хенара схьа дуьйна лелош ю хьиджаб а" аьлла. Мордоверчу гIажарой бехачу эвлахь зудаберашка... Читать дальше...

Кхилбаседан тIеман гонийн (ЮВО) полицин батальон Шемара юхаеана ша даим а куп тоьхначу Нохчийчу. ТАСС агенталле бина и хаам ЮВО-н пресс-гIуллакххойн куьйгалхочо Астафьев Вадима. "Нохчийчуьрчу полкан дозан тIехь йоккха митинг дIаяьхьира Шемара цIайирзинчу батальонан сийдеш", - аьлла Астафьевс. ТIеман полисхошна баркаллица дешнаш аьлла дуьхьалбаьхкинчу лакхарчу хьаькамаша а, буьйранчаша а, Шемахь цара къонахалла а, доьналла а гайтарца доьзна.

Оьрсийчоьнан Инарла прокуроре Чайка Юрийга а, омбудсмене Москалькова Татьяне а, президентехула йолчу адамийн бакъонийн Кхеташонан куьйгалхочуьнга Федотов Михаиле а кехат дахьийтина ГIалгIайчуьрчу вахархочо Добриев Руслана, шен 30 шо долу кIант Добриев Абу дIалацар хоуьйтуш. Iуьйранна 6 сахьт даьллачу хенахь шен воI доьзалца вехачу хIусам чу а лилхина, гIоьмаш тоьхна, иза дIавигина боху дас. ЦIийнах хьоьвсинчул тIаьхьа цу чуьра документаш а, оргтехника а дIаяьхьна ницкъахоша, Добриевс чIагIдарехь. Читать дальше...

Соьлжа-ГIаларчу "Ахмат Арена" стадионехь дIаоьллина Косово пачхьалкхан байракх  хиларх комментари йитина Нохчийчоьнан куьйгалхочо Кадыров Рамзана. Командан тобанхошлахь цигахь вина футболист ву, цундела латтош яра шаьш аьлла цо байракх. Косовон символика стадионехь латтор оцу бахьанашца ду, политикаца доьзна дац аьлла, тIечIагIдина Кадыровс. Оьрсийчоьнан йоллу позици ю Нохчийчоьнан а Косовох аьлла, тIетоьхна республикан куьйгалхочо. Лоруш йоцчу Косово Республикан байракх Соьлжа-ГIаларчу "Ахмат"... Читать дальше...

ФСБ-н директор лаьттина, Пачхьалкхан думан депутат Ковалев Николай кхелхина аьлла, хаамбина "Единая Россия" фракцин куьйгалхочо Неверов Сергейс. 69 шо дара Ковален. "Бакъволу къийсамхо вара иза, массо а хIуман бала кхочуш стаг а вара. Дуккха а дика дагалецамаш битина цо", - яздина Неверовс цунах лаьцна Фейсбукерчу шен пена тIехь. 1994-1996-чу а шерашкахь ФСБ-н директоран гIовс лаьттира иза, 1996-чу шеран аьхка дуьйна 1998-чу шаре кхаччалц къайлахчу сервисийн директор вара. 1999-чу шарахь хаьржира иза Пачхьалкхан думан депутат.