Пойабзал ишлаб чиқариш ҳажми 4,5 баравар ошди

Бугун мамлакатимизда чарм-пойабзал саноатини ривожлантиришга алоҳида эътибор қаратилаётир. Айниқса, чарм хом ашёсини тайёр маҳсулот ҳолида экспортга йўналтириш, импортни қисқартириш энг муҳим масалалардан биридир деб ёзмоқда xs.uz Хўш, бу борада “Ўзбекчармпойабзали” уюшмаси ва унинг тасарруфидаги корхоналар томонидан қандай чора-тадбирлар амалга оширилаётир? Маълумотларга кўра, 2017 йилда 703,1 миллиард сўмлик саноат маҳсулотлари ишлаб чиқарилган. 2010 йилда пойабзал ишлаб чиқариш ҳажми 3160 жуфтни ташкил этган бўлса, ўтган йили эса бу кўрсаткич 4,5 бараварга ошди, яъни 13894 жуфтга етказилган. Ўтган йили 20 га яқин чет давлатларга чарм маҳсулотлар экспорт қилинган. Шу йилда экспорт географиясини янада кенгайтириш режалаштирилган. Шу билан бирга, жорий йилда бир қатор инвестициявий лойиҳаларни амалга ошириш кўзда тутилган. Сунъий мех, сунъий қопламали чарм ишлаб чиқариш йўлга қўйилади. Уюшма мутахассислари таҳлилларига кўра, бугунги кунда 95 фоиз эркаклар ўзимизда ишлаб чиқарилаётган пойабзалларни киймоқда. Аёлларимизни сифатли пойабзаллар билан таъминлаш даражаси паст. Бунинг сабаби шуки, замонавий оёқ кийимларни ишлаб чиқаришга ихтисослаштирилган технологиялар етишмайди. Эндиликда тадбиркорлар учун жуда катта имкониятлар, имтиёзлар берилаётир. Бу муаммолар босқичма-босқич бартараф этилади. Шу боис келгусида аёлларга мўлжалланган сифатли ва замонавий пойабзаллар ишлаб чиқариш мақсадида туркиялик инвесторлар билан биргаликда учта корхона ишга туширилиши режалаштирилган.