قطر: امریکا باید افغانستان هېر نه کړي
د قطر د بهرنیو چارو وزیر محمد بن عبدالرحمان ال ثاني اسوشیټېډ پرېس اژانس ته پرون په واشنګټن کې وویل: "کله چې د افغانستان وضعیت څارو او د طالبانو له حکومت وروسته تغیراتو ته ګورو، هلته موږ ډېرو شیانو ته اندېښنه ښکاره کړې او د متحد ایالاتونو په ګډون نورو هم دا اندیښنه څرګنده کړې ده. دا اندېښنې په اساسي ډول د بشري حقونو له موضوعاتو سره تړلي، له تبعیض سره تړاو لري، د ښځو د حقونو مساله ده، د یوه پراخ بنسټه حکومت لپاره هڅول دي او د ترورېزم تهدیدونو ته اندېښنې دي."
قطر هغه هېواد دی چې د امریکا د متحد ایالاتونو او طالبانو ترمنځ یې د سولې د تړون په برخه کې ډېرې هلې ځلې وکړې او پرون یې موافقه وکړه چې په کابل کې به په خپل سفارت کې د امریکا د قونسلګرۍ د خدماتو څانګه پرانیزي او په افغانستان کې به د امریکا د ډپلوماټیکو موسساتو د امنیت څارنه کوي.