وېسټ: د کابل هوایي ډګر نوې وتونکو افغانانو ته ستونزې جوړې کړي

د افغانستان لپاره د امریکا ځانګړی استازی وایي، په افغانستان کې سخت ژمۍ به د کابل له نړیوال هوایي ډګره چې لا هم بشپړ فعالیت ته نه دی چمتو شوی، د هغو کسانو لپاره چې غواړي له دې هېواده ووځي، نوې ستونزې رامنځته کړي. 


ټام وېسټ په واشنګټن کې خبریالانو ته وویل، طالبانو تراوسه خپلې ژمنې تر ډېره پرځای کړي او هغو امریکایي اتباعو او د امریکا د اوږدې مودې هستوګنې اجازې لرونکو ته یې چې غواړي له افغانستانه ووځي د وتلو اجازه ورکړې.


ښاغلي وېسټ زیاته کړه، د ده په باوراساسي ستونزه چې دوی به ورسره مخامخ وي هغه تر ډېره لوژستیکي ستونزه ده، په تېره بیا اوس چې ژمۍ را روان دی. 


ټام وېست وویل، د کابل د نړیوال هوایي ډګر د رنوې ډېر څراغونه مات دي، هغه کارونه کوي او د ژمي په میاشتو کې د دې هوایي ډګر د فعالیت وړتیا د پوښتنې وړ ده. 


په اګسټ کې چې طالبانو یې په نیمایي کې کابل ونیو، تر پایه یې له دې هوایي ډګره د امریکایي او نورو هېوادونو د اتباعو په ګډون له ۱۲۰ زره زیات کسان وایستل شول.