اسلاماباد: نړیوال دې په افغانستان کې د طالبانو له حکومت سره تماسونه ټینګ کړي
د پاکستان د ملي امنیت سلاکار له نړیوالو وغوښتل چې په افغانستان کې د طالبانو له حکومت سره تماسونه ټینګ کړي.
د پاکستان د ملي امنیت سلاکار موید یوسف د سې شنبې په ورځ په اسلاماباد کې خبري غونډې ته په دې اړه وویل: ؛ټوله نړۍ باید د افغانستان له اوسني حکومت سره همکاري وکړي او ورسره په تماس کې شي. له دوی سره باید د رغنده ښکېلتیا له لارې مرسته وشي ترڅو یو بشري بحران رامنځته نهشي."
ښاغلي یوسف ته هند بلنه ورکړې ده چې راتلونکې اوونۍ په نوې ډېلي کې د افغانستان په اړه په جوړېدونکې غونډه کې برخه واخلي، خو ده وویل چې په دې غونډه کې ګډون نهکوي.
په دې دوه ورځنۍ غونډه کې چې راتلونکې اوونۍ چهارشنبه پيلېږي د پاکستان سربېره د چین، تاجکستان، ازبکستان، ترکمنستان، ایران او روسیې د ملي امنیت سلاکارانو ته د ګډون بلنه ورکړل شوې ده.
وروسته تر دې چې طالبانو د اګسټ په ۱۵مه کابل نیولی دی دا لومړۍ غونډه ده چې د افغانستان لپاره د هند په نوښت جوړېږي.
هند په سیمه کې هغه هېواد دی چې په تېرو ۲۰ کلونو کې یې تر بل هر هېواد له افغانستان سره ډېره مرسته کړې ده، دا مرستې شااوخوا درې میلیارده ډالرو ته رسېږي.
د پاکستان د ملي امنیت سلاکار موید یوسف پر ټولو هېوادونو غږ وکړ چې له افغانستان سره مرستې وکړي، د موید یوسف په باور ژمی راروان دی، په افغانستان کې د خوړو کمبود دی او که مرسته ونهشي وضعیت به ډېر خراب شي.