مسکو: د مایکروسافټ د انټرنټي برید په اړه لا معلومات نه لرو
دمیتري پیسکوف په مسکو کې یوه کنفرانس ته دا خبره داسې مهال وکړه چې تردې مخکې مایکروسافټ وویل، روسي هککرانو د امریکا د نړیوالې پراختیايي ادارې 'USAID' د یوه ایمیل په کارولو سره د متحده ایالاتونو پر ادارو تازه سایبري حمله کړې ده.
د مایکروسافټ شرکت مرستیال تام برت 'Tom Burt' په یوه بیان کې ویلي، د انټرنټي بریدونو په دې تازه لړۍ کې د ایمیلونو درې زره حسابونه په نښه شوي چې په ۱۵۰ سازمانونو او بنسټونو پورې تړاو لري.
د روسیې د دې سایبرې حملې خبر درې اوونۍ مخکې له هغه راوځي چې تمه ده د امریکا ولسمشر جو بایډن له خپل روسي سیال ولادمیر پوتین سره د سویس په جنیوا کې وګوري.
د روسیې له خوا پر امریکا د تېر کال د ډسمبر میاشتې د سایبري بریدونو له امله د دواړو هېوادونو تر منځ کړکېچ لا پر ځای پاتې دی.
ولسمشر جوبایډن تېره میاشت د هغو انټرنټي حملو په غبرګون پر روسیې بندیزونه اعلان کړ، خو روسیې په هغو حملو کې خپل دخالت رد کړی و.