د امریکا د بهرنیو چارو وزیر انتوني بلېنکن راتلونکې اوونۍ اوکراین ته ځي
د امریکا دمتحدو ایالاتونو د بهرنیو چارو وزیر انتوني بلېنکن په پام کې لري چې د را روانې چهارشنبې او پنجشنبې په ورځو کییف ته سفر وکړي.
د امریکا د بهرنیو چارو وزارت پرون د اپرېل په دېرشمه په یوه بیان کې وویل چې ښاغلی بلېنکن به په لندن کې د اوو سترو صنعتي هېوادونو د بهرنیو چارو د وزیرانو غونډه کې له ګډون وروسته اوکراین ته ولاړ شي.
بلېنکن به د دې سفر پر مهال له ولسمشر ولودیمیر زیلینسکي، د بهرنیو چارو له وزیر دیمیترو کولېبا او د اوکراین د مدني ټولنو له استازو سره وګوري او د روسیې د روان یرغل پر وړاندې د اوکراین له ارضي تمامیت او ملي حاکمیت څخه د امریکا پر ملاتړ به ټینګار وکړي.
بلېنکن به په اوکراین کې د بنسټونو د اصلاح په تېره د فساد د له منځه وړلو په برخه کې پرمختګ وهڅوي.
بلېنکن دا سفر داسې مهال کوي چې د روان کال له پیله د اوکراین په ختیځ کې د دولتي ځواکونو او روس پلوو بیلتونپالو ترمنځ نښتو زور اخیستی.
د ۲۰۲۰ میلادي کال په جولای میاشت کې د دواړو خواوو ترمنځ د اوربند له ټينګېدو سره-سره په تېرو څلورو میاشتو کې شااوخوا دېرش تنه اوکرایني پوځیان په دې سیمه کې وژل شوي دي.
د اوکراین پولو ته نژدې او د روسیې له خوا د اوکراین په اشغال شوې سیمه کریمیا کې په وروستیو څو اونیو کې د روسیې د پوځي حضور پیاوړي کېدلو په کییف او لویدیځ کې د دې کړکېچ د پراختیا اندېښنې وپارولې.
کریملین د لویدیځ دا اندېښنې بې ځایه بللې دي.
د امریکا د بهرنیو چارو وزیر له CBS نیوز سره په یوه مرکه کې چې سبا د مې په دوهمه نېټه به خپره شي ویلي دي چې متحدایالات د روسیې د دې اقداماتو په اهدافو نه پوهېږي.
د روسیې پوځ د اپرېل په ۲۹ مه نېټه ادعا وکړه چې تقریباً ټول ځواکونه یې په پراخو پوځي تطبیقاتو کې له ګډون وروسته بېرته دایمي اډو ته ستانه شوي.
امریکا او د ناټو نور غړي وايي، د روسیې دا اقدامات له ۲۰۱۴ کال راهیسې- چې روسیې کریمیا د خپل قلمرو جز وګرځوله او د اوکراین د ختیځ په دونېڅګ او لوهانسک سیمو کې یې د بېلتونپالو بې درېغه ملاتړ پیل کړ ساری نه لري.