ՎՏԲ–Հայաստան Բանկը շարունակում է օժանդակել սահմանափակ կարողություններով երեխաներին
«Դրանցից մեկը մանկական ուղեղային կաթվածով հիվանդ 9 տարեկան Արտակ և Արսեն զույգ եղբայրներին աջակցությունն է»,– նշվում է հաղորդագրության մեջ։
ՎՏԲ-Հայաստան Բանկի առաջին հանդիպումը եղբայրներին կայացավ 2014թ.-ի ամռանը Ստեփանավանի «Էլեն» հանգստյան տանը մանկական ներառական ճամբարի բացմանը: Ավելի ուշ բանկն արձագանքեց «Հայ մայրեր» հասարակական կազմակերպության ննախագահ Նարինե Մանուկյանի կոչին` օգնել զույգ եղբայրներին:
Նրանց բարեհաջող վիրահատեցին Երևանի «Արաբկիր» բժշկական համալիր-երեխաների և դեռահասների առողջության ինստիտուտում, որից հետո նրանք աստիճանաբար վերադառնում են լիարժեք կյանքի: Վերականգնողական ողջ ընթացքում բանկը երեխաների կողքին է և ապահովում է նրանց անհրաժեշտ ամեն ինչով:
Իր բարեգործական գործունեությունում ՎՏԲ-ն հիմնվում է կարիքավորներին հասցեագրված օգնություն ցուցաբերելու վրա` նախապատվությունը տալով մանկական հաստատություններին: 2012թ.-ից բանկն ամենամյա աջակցություն էր ցուցաբերում Ստեփանավանում գտնվող «Էլեն» հանգստյան տանը: Ճամբարը անհրաժեշտ ենթակառուցվածքներով ապահովելու նպատակով Բանկն իրականացրել է հանգստյան տան վերանորոգումը, բարեկարգել քոթեջներն ու հանգստյան տան տարածքը` հաշմանդամի սայլակներով երեխաների տեղաշարժը պարզեցնելու համար, կազմակերպում է տոնական միջոցառումներ երեխաների համար:
Բանկի աշխատակիցները պարբերաբար մասնակցում են երեխաների համար անցկացվող բարեգործական դրամահավաքին:
ՎՏԲ-Հայաստան Բանկը տոնական միջոցառումներ է կազմակերպում նաև օնկոլոգիական հիվանդություններ ունեցող, ինչպես նաև Գավառի մանկատան երեխաների համար: Այս տարի բանկը սահմանափակ կարողություններով երեխաների համար հարմարեցված ժամանցային կենտրոնում Երեխաների պաշտպանության միջազգային օրվա կապակցությամբ տոն էր կազմակերպել մանկական ուղեղային կաթված ունեցող և անապահով ընտանիքների երեխաների համար:
«ՎՏԲ-Հայաստան բանկ» ՓԲԸ–ն ՎՏԲ միջազգային ֆինանսական խմբի մասնակից է դարձել 2004թ.–ի ապրիլին: «ՎՏԲ բանկ» ԲԲԸ–ն «ՎՏԲ-Հայաստան բանկ» ՓԲԸ–ի 100% բաժնետոմսերի փաթեթի միանձնյա բաժնետերն է։ Բանկը հիմնական ցուցանիշների մի ամբողջ շարքով մշտապես ներառվում է ՀՀ բանկային համակարգի առաջատարների թվի մեջ: Ներկա դրությամբ բանկն ունի ամենալայն մասնաճյուղային ցանցը ողջ երկրում` 67 մասնաճյուղ:–0–