Алабуга кызы Миңсылу Сәлахова «Татарстанның нәни гүзәле-2021» исемен яулаган
(Казан, 31 май, «Татар-информ», « Алабуга нуры »). Габдулла Тукай исемендәге Татар дәүләт филармониясе сәхнәсендә матурлык һәм талантлар конкурсының финалында Алабуга кызы Миңсылу Сәлахова «Татарстанның нәни гүзәле-2021» исемен яулады, дип яза районы басмасы.
Сигез яшьлек Миңсылу бадминтон белән мавыга, фортепианода уйный һәм вокал белән шөгыльләнә. Аның Лэйна башкаруындагы «Малай на белом барсе» җырына клип-пародиясен Интернетта берничә дистә мең кеше карады.
«Башта Казанда сайлап алу туры булды. Ул конкурска караганда күпкә җиңелрәк булып чыкты. Анда иҗади номерны гына тәкъдим итәргә кирәк иде, мин татарча җырладым. Икенче этапка узгач, анда катнашырга кирәкме икән, дип уйладык, безне бу фикердән кире кайтырга өндәделәр. Кызык булып китте, һәм тәвәккәлләргә булдык», — ди Миңсылу.
Ул репетицияләрдә бик нык арыганлыгын әйтте. Конкурсның бию өлешендә дә кыенлыклар туган, чөнки Миңсылу бию белән шөгыльләнми, ә катнашучылар арасында бию белән җитди мавыгучылар да булган. Шулай да Миңсылу Сәлахова артистларча осталык күрсәтеп, көндәшләрен артта калдырып, иң яхшысы булды, дип яза районы басмасы.