(Казан, 21 гыйнвар, «Татар-информ»). Санкт-Петербургта 23 гыйнварда 12.00 сәгатьтә Милли әдәбиятлар китапханәсендә «Татарлар Бөек Ватан сугышында. Әбсәләмов укулары» иҗади кичәсе булачак. Татарстан Республикасының Санкт-Петербург шәһәрендәге һәм Ленинград өлкәсендәге Даими вәкиллеге матбугат хезмәте хәбәр итүенчә, вәкиллек тарафыннан оештырылган кичә 18нче Мгниск Кызыл Байраклы укчы дивизия командиры генерал-майор Минзакир Әбсәләмовка багышлана. «Татар кунакханәсе» мәдәни-агарту проекты кысаларында кичәне Россия һәм Татарстанның атказанган мәдәният хезмәткәре, Ленинград өлкәсенең Тосна районы «Изге юл» татар җәмгыяте иҗтимагый оешмасы рәисе Гыйниятулла Кутуев алып бара. Очрашуда шулай ук Милли әдәбиятлар китапханәсе фондларыннан «Татарлар Бөек Ватан сугышында» дип аталган күргәзмә дә ачылачак.
