(Казан, 19 гыйнвар, «Татар-информ», Эвелина Киселёва). Татарстанда яңа коронавирус инфекциясеннән «Спутник V» препараты белән прививканың икенче өлешен 92 яшьлек Зинаида Бодрягинага ясадылар. «Үземне бик яхшы хис итәм. Прививкалардан соң нинди дә булса өзлегүләрдән куркырга кирәкми дип саныйм. Болар барысы да җиңел уза», - диде әби. 21нче поликлиникада 21 көн элек үткәрелгән беренче прививкадан соң ул үзен яхшы хис итә, температура да, ОРВИ симптомнары да булмаган. Шуңа күрә икенче фазаны ясатырга ул бик теләп килгән. «Прививка кабинетына курыкмыйча кердем һәм тыныч кына киттем», - диде әби. Зинаида Бодрягина 1928 елның 29 сентябрендә туа. Алдагы көнне вакцинаның икенче дозасын аның оныгы да алды. Зинаида Бодрягина прививка ясату карарын мөстәкыйль кабул иткән, чөнки үзе медицинада 43 ел эшләгән кеше. Карьерасын Казанның баш санитар табибы урынбасары вазифасында тәмамлаган. Зинаида Никаноровнаның хроник авырулары бар: шикәр диабеты, йөрәкнең ишемик авыруы һәм гипертония.
