Гөлнара Сергеева: Халык санын алуга кагылышлы 100 дән артык мөрәҗәгать килеп иреште

(Казан, 19 гыйнвар, «Татар-информ», Гөлнар Гарифуллина). Халык санын алуга бәйле рәвештә, Татарстанда 100 дән артык мөрәҗәгать килеп ирешкән.

Бүген Бөтендөнья татар конгрессының Милли шура утырышында «SERGIS» адвокатлар коллегиясе адвокаты Гөлнара Сергеева халык санын алуга әзерлек барышында юридик төркем эше белән таныштырды. «Безнең компанияне конгресс сайлады, безнең өчен халык санын алу буенча хокукый ярдәм күрсәтү зур дәрәҗә», — диде.

Ул бер ел элек Бөтендөнья татар конгрессы Башкарма комитеты һәм «SERGIS» адвокатлар коллегиясе арасында килешү төзелгәнен искәртте. Унлап юрист эшләгәнен, барысы да югары белемле, тәҗрибәле белгечләр булуын әйтте. «Бу вакыт эчендә 100 дән артык мөрәҗәгать килеп ирешкән. Алар барысы да консультация характерында. Җанисәпкә кадәр без күп очракта аңлату эшләрен алып барабыз», — диде Гөлнара Сергеева.

Аның сүзләренчә, җанисәптә катнашу нәрсәгә кирәк дип сораучылар булган. Ул кешеләрне яшәү чыганагы, торак шартлары, мәгарифкә бәйле сораулар берникадәр куркытканын әйтте.

«Халыкка барлык сорауларны аңлатырга кирәк. Мәсәлән, торак шартлары турында сөйләшәбез икән, бу бөтен илдә социаль структура, җылыту, су белән тәэминат системасын, транспорт инфраструктурасын булдыру өчен кирәклеген аңлатырга кирәк. Җанисәп кешеләрнең персональ белешмәсен ачыкламый, географик яктан урнашкан урыны гына кирәк», — диде Гөлнара Сергеева.

Аның сүзләренчә, башка регионнардан да юристлар бу килешү турында белеп, татарстанлылар белән элемтәгә чыккан. «Бушлай консультация ярдәме тәкъдиме белән мөрәҗәгать итә башладылар. Башкортстаннан коллегалар чыкты. Бу сөендерә, алар татарлар өчен җан атып, Башкортстан территориясендә ярдәм итәргә әзерләр. Без алар белән дә килешү әзерлибез», — диде.