Lajçak, të martën në Kosovë

Përfaqësuesi i posaçëm i Bashkimit Evropian në dialogun midis Kosovës dhe Serbisë, Mirosllav Lajçak, do të qëndrojë të martën në Kosovë.

Nga Qeveria e Kosovës e konfirmuan lajmin për Radion Evropa e Lirë, por nuk u dhanë detaje rreth agjendës së diplomatit.

Lajçak, në ditët në vijim, pritet të vizitojë edhe Beogradin për, siç u tha në Bruksel, "zhbllokimin e çështjes së Asociacionit të komunave me shumicë serbe".

Kosova ka thënë se nuk dëshiron ta hapë më çështjen e këtij Asociacioni, por Serbia insiston që të bisedohet për të.

Formimi i tij është paraparë me Marrëveshjen e Brukselit të vitit 2013, të arritur në dialogun Kosovë-Serbi.

Në vitin 2015, dy vendet, nën ndërmjetësimin e Bashkimit Evropian, kanë arritur edhe një marrëveshje shtesë për themelimin e këtij Asociacioni.

Por, Gjykata Kushtetuese e Kosovës ka konstatuar se parimet për të nuk janë në përputhje me Kushtetutën e Kosovës, edhe pse ka thënë se ato mund të harmonizohen me një akt ligjor të Qeverisë së Kosovës.

Kryeministri i Kosovës, Avdullah Hoti, ka përsëritur në disa raste se çështja e Asociacionit është një temë tashmë e mbyllur.

Të hënën, Lajçak iu adresua ministrave të Jashtëm të BE-së për dialogun Kosovë-Serbi.

“Jam mirënjohës për interesin e tyre të sinqertë dhe mbështetjen e fuqishme. Diskutimi i sotëm konfirmoi se dialogu është qartazi i lidhur me të ardhmen evropiane të Kosovës dhe Serbisë”, shkroi Lajçak në një postim në Twitter.

 

Ministrat e jashtëm të BE-së u mblodhën të hënën për të diskutuar një sërë çështjesh, përfshirë dialogun Kosovë-Serbi, sanksionet e mundshme ndaj Rusisë për rolin e saj të pretenduar në helmimin e politikanit të opozitës, Aleksei Navalny, si dhe situatën në Bjellorusi.

Dialogu Kosovë-Serbi, që synon normalizimin e marrëdhënieve midis dy vendeve, ka nisur qysh në vitin 2011 me ndërmjetësimin e Bashkimit Evropian dhe mbështetjen e Shteteve të Bashkuara.

BE-ja, në disa raste, e ka bërë të qartë për Prishtinën dhe Beogradin se e ardhmja e tyre evropiane lidhet me përparimin e bërë në dialog.

Muajin e kaluar, dy vendet kanë arritur një marrëveshje për normalizimin e marrëdhënieve ekonomike, e cila është nënshkruar në Shtëpinë e Bardhë, në praninë e presidentit amerikan, Donald Trump.

Kosova insiston se dialogu duhet të përmbyllet me njohje të ndërsjellë me Serbinë, ndërsa kjo e fundit thotë se nuk do ta njohë Kosovën shtet.