Новости за 12.04.2020

ТIаьххьарчу дийнахь-буса Къилбаседа Кавказан 5 регионехь билгалбевлла ун хьакхаделла нах. Оьрсийчоьнан уьнца къийсам латточу оперативан штабо гойтучу терахьаша бахарехь, Нохчийчохь ун хьакхаделла хилар гайтина 17 вахархочун тесташа, Ставропол-махкахь – 8, Къилбаседа ХIирийчохь – 7, ГIебарта-Балкхаройчохь – 5, Кхарачой-Чергазийчохь – 2. Къилбаседа Кавказан кхечу мехкашкахь ца хааделла керлачу наханна ун хьакхаделла.

ТIаьххьарчу 24 сахьтехь Оьрсийчохь COVID-19 ун хаькхадаларца 52 регионехь билгалваьлла 2186 стаг, хаамбо уьнца къийсам латточу штабо. Инфекци хьакхаеллачаралахь уггаре дукха нах бу Москвахь - 1306 стаг. Москвана гонахарчу гIаланашкахь билгалваьлла 278 вахархо. Коронавирус Петербургехь гучуяьлла 69 стагехь. Оьрсийчохь верриг а уьнах цомгуш хилларг ву 15770 стаг. ТIаьххьарчу дийнахь буса уьнах велла 24 стаг. 14 ву царех Москвара. Коронавирус яьржичхьана схьа велла Оьрсийчохь 130 стаг. Уггаре дукха бу вирусах цомгуш хилла нах Москвахь ... Читать дальше...

Чохь-цIахь ца совцуш, карантинан хьелаш талхош лела бахархой аренашна тIехь къахьега хIиттор бу ша, аьлла Нохчийчоьнан куьйгалхочо Кадыров Рамзана. "Стаг, ша карантинехь воллушехь, цхьа бахьана а доцуш, хIара хьал дерзаре а ца хьоьжуш, цIера аравалахь, цунна дан хIума карор ду вайна. Цо цхьаьна юьстахарчу меттехь латта охур ду, дуьйр ду», - боху Кадыровс Инстаграмерчу эфирехь. Доьзало ша бахьанехь токхучу гIудан метта бийр бу цо и болх, Кадыровс бахарехь.

Шен пресс-гIоьнчин дарже керла стаг хIоттийна Нохчийчоьнан куьйгалхочо Кадыров Рамзана – «Грозный» телерадиокомпанин директоран гIовс Вахидов Iилман. 11 шарахь оцу даржехь Iийна Кадыровн орденлелорхо, нохчийн журналистикан ветеран Каримов Iаьлви пенсе вахана, яздо "Интерфаксо". Хаамийн гIирсех жоп лучу шен хьехамчин дарже хIоттийна Нохчийчоьнан куьйгалхочо Ельсаев Iаламад. Цул совнах, иза тIехьожуш хир ву яздархойн юкъарлонна а, нохчийн мотт Iалашбаран а, кхиоран а экспертийн кхеташонна а.