Челябинсклик аёл боласини ўгай отаси зулмидан ҳимоялаш учун қотилликка қўл урди…
Россиянинг Челябинск вилоятида яшовчи исми-шарифи тергов манфаатларини кўзлаб сир тутилган аёл 8 яшар ўғилчасини ўгай ота калтакларидан ҳимоя қилиш учун қўлига болта олишга мажбур бўлди. Аввалига эр аёлнинг ўзига ташланди. Бунисига чидарди. Чунки эрининг калтаклашлари биринчи марта эмасди. Аммо 8 яшар ўғлини калтаклашига чидаб тура олмади ва уни ҳимоя қилишга ўтди. Қўлига болта кирибди. Болта билан золим эрнинг бошини чопиб ташлади. Эркак ўша жойнинг ўзида ўлим топди. Аёл шу заҳоти боласини олди-ю, опасиникига жўнади. Опаси шубҳалангани йўқ. Сабаби, эридан калтак еди дегунча синглиси уникига чопқилларди. Қотилликдан қўшниларнинг бири хабар топди. У анча кундан бери эр-хотин кўринмай қолгани учун хавотирланиб мўралашга қарор қилганди. Қўшнилар дарҳол полицияга хабар қилишди. Терговчиларнинг айтишича, марҳум кўп ичаркан. Эр-хотин иккови ҳам ҳеч қаерда ишламас экан. Ичкилик туфайли ораларида тез-тез жанжал юзага келаркан.
Айни пайтда аёл қўлга олинган. Ушбу факт юзасидан Россия жиноят мажмуасининг 105- моддаси 1- қисми («Қотиллик») га асосан жиноий иш қўзғатилган. Айби исботланса, аёл 15 йил муддатга озодликдан маҳрум этилиши мумкин.