Новости за 13.09.2023

Татарстанның Тукай районында туып-үскән 23 яшьлек рядовой Андрей Малахов 2 сентябрьдә махсус хәрби операция барышында бурычын үтәгәндә һәлак булган. Хәрбине Новотроицкое авылына алып кайтып җирләделәр. Бу хакта «Якты юл» сайтында хәбәр ителә.

Питрәч районы Борогодское авылында узган ел ачылган мәчет янәшәсендә ифтар һәм төрле дини бәйрәмнәр өчен зал төзелә. Ул 60-70 кешене сыйдырачак. Аш бүлмәсеннән тыш, ифтарханда ризык әзерләү өчен кухня өлеше булачак. Бу хакта Бөтендөнья татар конгрессы матбугат хезмәте хәбәр итә.

Россия мөселманнарының рухи лидеры, мөфти шәех Равил Гайнетдин Ливиянең көнчыгышында су басулар нәтиҗәсендә кешеләр һәлак булу сәбәпле, кайгы уртаклашты. Көчле су басулар «Даниэль» гарасаты аркасында килеп чыккан. Бу хакта Россия Мөфтиләр шурасы матбугат хезмәте яза.

Дәүләт Думасының Гаилә, хатын-кызлар һәм балалар мәсьәләләре комитеты рәисе Нина Останина Дәүләт Думасына мохтаҗ гаиләләргә балаларына 18 яшь тулганчыга кадәр пособие түләргә тәкъдим ителгән закон проектын кертте. Закон проекты Думаның электрон базасында бар. Бу хакта РИА Новости яза.

Питрәч районының Беренче Май бистәсендә мәчет ачыла. Аның нигезенә беренче таш узган елның декабрендә салына. Бүген исә ул кунаклар кабул итәргә әзер диярлек. Бина эчендә бизәү эшләре генә калган, шулай ук территорияне тыштан төзекләндерәләр. Бу хакта Бөтендөнья татар конгрессы матбугат хезмәте яза.

Россия саклану министры Сергей Шойгу мобилизация, хәрби хәл яки сугыш вакытында россиялеләргә контракт белән хезмәткә алынуда киртә булырдай чирләр исемлеген раслады. Әлеге документ хокукый мәгълүмат порталында дөнья күргән.

Татарстан синоптиклары һава шартларының начарлануы турында кисәтә. Бүген төнлә һәм иртәгә иртән республикада урыны белән томан төшүе фаразлана.

Түбән Кама янында Кама Аланы бистәсендә үлемгә китерүче юл-транспорт һәлакәте булган.

«Россия — ислам дөньясы» стратегик күзаллау төркеме җитәкчесе, Татарстан Рәисе Рөстәм Миңнеханов Ливиянең төньяк-көнчыгышындагы давыл һәм су басуның фаҗигале нәтиҗәләре белән бәйле рәвештә кайгы уртаклашты. Телеграмма Ливиянең Президент советы рәисе Мөхәммәт Менфига җибәрелгән.

Бөгелмәдә яшәүче Таисия Балаева республика җитәкчелегеннән Татарстан Дәүләт Советы утырышында катнашырга чакыру алды, анда республика Рәисе Рөстәм Миңнеханов еллык юллама белән чыгыш ясаячак. Чара 14 сентябрьдә була. Кичә Таисия Балаевага Бөгелмә районы башлыгы Линар Закиров килгән. Бу хакта «Татар-информ»га муниципаль берәмлекнең матбугат хезмәтеннән хәбәр иттеләр.

Бүген Яшел Үзәндә кыска вакытлы ялга кайткан махсус операция зонасы хәрбиләре белән очрашу узган. Бу очрашу инде бишенчесе. Бу хакта «Татар-информ»га Яшел Үзән районы хакимияте матбугат хезмәте хәбәр итте.

Татарстанның Түбән Кама районы башлыгы Рамил Муллин үзенең телеграм-каналында химиклар башкаласында яңартылган юлларны күрсәткән.

Бүген «Татмедиа» акционерлык җәмгыятенең «Нурлат-информ» филиалы коллективында Казначей «кушаматлы» хәрби Аркадий кунакта булган.

Чаллының Суар бистәсендә яңа мәчет ачылуга әзерлек эшләре төгәлләнеп килә. Бу хакта «Челнинские известия» территориаль иҗтимагый үзидарә рәисе Әнвәр Таһиров сүзләренә сылтама белән хәбәр итә.

20 октябрьдә Свердловск өлкәсенең Красноуфимск шәһәрендә «Тере классика» татар шагыйрь һәм язучылары әсәрләрен укучыларның әдәби бәйгесе узачак. Бу хакта Татарстан Республикасының Свердловск өлкәсендәге Даими вәкиллеге хәбәр итә.

Чиләбедә күренекле музыкант – балалайкада уйнаучы, М.П.Мусорский исемендәге Урал дәүләт консерваториясе профессоры, Россиянең халык артисты Шәүкәт Әмиров истәлегенә багышланган концерт була. Бу хакта Чиләбе өлкәсе татарлары конгрессының социаль челтәрдәге сәхифәсендә хәбәр ителә.

Казанның «Урам» экстрим-паркында XXXIII Татар яшьләре көннәре ачылышы булды. Бирегә Россиянең 23 төбәгеннән 150 делегат килгән. Татар яшьләре көннәре 17 сентябрьгә кадәр дәвам итәчәк.

Татарстан Рәисе, «Россия — Ислам дөньясы» стратегик күзаллау төркеме җитәкчесе Рөстәм Миңнеханов Марокко короле, галиҗәнап Мөхәммәт VI гә кайгы уртаклашу телеграммасы җибәргән. Бу хакта республика җитәкчесе матбугат хезмәте хәбәр итә.

Төмән өлкәсе «Мирас» төбәк татар иҗтимагый оешмасы 18 еллыгын билгеләп үтә. 2005 елның 12 сентябрендә оешма дәүләт теркәве турында таныклык алган. Бу хакта Бөтендөнья татар конгрессының матбугат хезмәте хәбәр итә.

Кичә Байбулат Батуллинның «Ядәч! Истә!»/»Бери да помни» фильмы Роза Хәйруллинаның туган көне уңаеннан Мәскәүдә күрсәтелгән.

Халыкара «Татар кызы» бәйгесендә Төркияне Аделина Гайнетдинова тәкъдим итә. Тумышы белән Башкортстанның Учалы районыннан булган кыз «Татар-информ» хәбәрчесенә Төркиядәге тормышы һәм бәйге финалына әзерлек турында сөйләде. «Җиңү турында уйламыйм, чөнки монда булу – ул инде җиңү», – диде Аделина Гайнетдинова.

Биш көн эчендә өч режиссер Әлмәт театры сәхнәсендә өч комедия эскизы тәкъдим итәчәк. Өч пьесаның икесе татар драматургы әсәре.

2022 ел нәтиҗәләре буенча Татарстан белән Үзбәкстанның товар әйләнеше 50 процентка арткан. Быел республикаларга товар һәм хезмәт күрсәтү күләмен арттыруны дәвам итәргә кирәк. Бу хакта Татарстан Рәисе Рөстәм Миңнеханов Үзбәкстанның Россиядәге Гадәттән тыш һәм Тулы вәкаләтле илчесе Ботиржон Асадов белән очрашуда хәбәр итте.

Бүген төнлә Әгерҗе районының Әзи авылында яшәүчеләр сирәк очрый торган күренешне - күкнең төрле төсләргә керүен күзәткән. Төньяк балкышының матур фотолары интернет челтәрендә таралды.

Татарстан Дәүләт Советы Рәисе Фәрит Мөхәммәтшин Татарстаннан сайланган РФ сенаторлары һәм РФ Дәүләт Думасы депутатлары белән киңәшмә үткәрде. Бу турыда Дәүләт Советының матбугат хезмәте хәбәр итте.