Фәрит Мөхәммәтшин Татарстаннан сайланган сенаторлар һәм Дума депутатлары белән очрашты
Татарстан Дәүләт Советы Рәисе Фәрит Мөхәммәтшин Татарстаннан сайланган РФ сенаторлары һәм РФ Дәүләт Думасы депутатлары белән киңәшмә үткәрде. Бу турыда Дәүләт Советының матбугат хезмәте хәбәр итте.
Татарстан Республикасы Рәисенең Дәүләт Советына еллык Юлламасы алдыннан Дәүләт Советында узган киңәшмәдә 2024 елга, 2025 һәм 2026 елларның план чорына республиканың социаль-икътисади үсешен һәм берләштерелгән бюджетын фаразлауның төп параметрлары, шулай ук республика икътисадына федераль акчаларны җәлеп итү мәсьәләләре тикшерелде.
Киңәшмәне ачып, Фәрит Мөхәммәтшин искә төшергәнчә, хәзерге вакытта республикада алдагы өч еллык чорга бюджет формалаштырыла, бюджет процессы федераль дәрәҗәдә дә башланды. «Санкцияләргә карамастан, без республикабызның күптармаклы икътисадының халык хуҗалыгының барлык юнәлешләрен дә саклап калдык. Авыл хуҗалыгы секторы уңышлы эшли, Татарстан тулаем сөт саву буенча беренче урында тора», – диде ул.
Киңәшмәдә Татарстан Республикасының 2024-2026 елларга социаль-икътисади үсешен фаразлауның төп параметрлары буенча доклад белән Премьер-министр урынбасары – Татарстан Республикасы икътисад министры Мидхәт Шаһиәхмәтов чыгыш ясады. 2024 елга, 2025 һәм 2026 еллар план чорына Татарстан Республикасының берләштерелгән бюджеты фаразын депутатларга Татарстан Республикасы финанс министры Радик Гайзатуллин хәбәр итте.
Фәрит Мөхәммәтшин республиканың закон чыгару инициативаларын гамәлгә ашыру мәсьәләләренә аерым тукталды. Хәзерге вакытта Россия парламентының түбән палатасында Татарстаннан алты закон чыгару инициативасы карала. Дәүләт Советы Рәисе сенаторларны һәм Дәүләт Думасы депутатларын закон инициативаларын алга алып бару мәсьәләсен контрольгә алырга, ә республика парламентының профильле комитетлары рәисләрен Дәүләт Думасы комитетлары белән эшне активлаштырырга чакырды.
Россия Федераль Җыенына сайланган Татарстан депутациясе белән очрашулар традициягә әверелде. Республикада 17 эшче төркем эшли, аларның һәрберсен тармак өчен җаваплы булган депутат җитәкли. Эшче төркемнәр составына шулай ук республика министрлыклары һәм ведомстволары вәкилләре керә. Татарстан Республикасы Рәисе Рөстәм Миңнеханов кушуы буенча эшче төркемнәр эшчәнлегенә гомуми җитәкчелек һәм координацияләүне Дәүләт Советы Рәисе Фәрит Мөхәммәтшин башкара.
Эшче төркемнәр эшчәнлегенең төп юнәлешләре – илкүләм проектларда һәм дәүләт программаларында катнашу аша Татарстан икътисадына федераль акчалар җәлеп итү, республиканың закон чыгару инициативаларын алга сөрү, гражданнарның наказларын гамәлгә ашыру буенча эшләр башкару.