Новости за 03.09.2023

Зәй районы Түбән Биш авылында Анисимовлар нәселе очрашу уздырды. Төп йортта дүрт буын туганнар — әби-бабайлар, әти-әниләр, балалар, оныклар җыелды. Мондый туганнар белән очрашу бәйрәме барысын җыя, очраштыра, үткәннәр хакында җылы хисләр белән искә алырга мөмкинлек бирә. Бу турыда «Зәй яңалыклары» хәбәр итә.

Август аенда үткәрелгән «Чәчәкле Саба» конкурсында шәхси хуҗалыклар, оешмалар, авыл җирлекләре, мәгариф, сәламәтлек саклау, мәдәният, спорт учреждениеләре арасында җиңүчеләр һәм призерлар бүләкләнде. Бәйге җиңүчеләренә башкарма комитет җитәкчесе Марат Ишниязов бүләк сертификатлары тапшырды. Бу хакта «Саба таңнары» хәбәр итә.

Актанышта Педагоглар һәм остазлар елында мөгаллимнәргә карата республика җитәкчелегенең дә игътибары гаять зур. Аларны зурлап бик күп төрле чаралар уздырыла. Иске Байсар мәктәбе дә мәгариф ветераннарын котлады. Бу хакта «Актаныш таңнары» сайтында хәбәр ителә.

Питрәч районы үзәгендә яңа пекарня барлыкка килде, анда ипинең төрле сортлары һәм камыр ризыклары пешерелә һәм сатыла. Шулай ук залда яңа ясалган кофе эчәргә, кайнар шоколад белән җылынырга мөмкин. Бу хакта «Алга» газетасы хәбәр итә.

Казан федераль университетының Дизайн һәм пространство сәнгате институты магистранты Эльвира Мингалимова 1 млн сум грант алды. Грант «Россия төбәкләренең традиция һәм үзенчәлекләрен исәпкә алып, милли җиһаз прототипларын эшләү һәм җитештерү» проектын гамәлгә ашыру өчен бирелгән. Бу хакта югары уку йортының матбугат хезмәте хәбәр итә.

Киләсе атна уртасына кадәр Татарстан территориясендә аномаль җылы һава торышы көтелә. Бу Татарстан Гидрометеорология үзәге мәгълүматларыннан күренә.

Уфада Россия Герое Миңнегали Шәйморатов һәйкәле янына мактаулы каравыл куелды. Бу хакта «Башинформ» яза.

Казан халкы һәм кунаклары 5 сентябрьдә Татарстан Милли музеена һәм аның филиалларына бушлай керә алачак.

Бүген Яшел Үзәндә «Маяк» спорт комплексы территориясендә «Йөгер! Ашат! Яшә!» дип аталган хәйрия йөгереше узды. Ул «Кеше приюты» проектының биш еллыгына багышланган. Стартка меңнән артык катнашучы чыкты, алар арасында район башлыгы Михаил Афанасьев та бар.

Нефть һәм газ сәнәгате Россия икътисадында аерым урын алып тора һәм күп яктан илнең үсешен һәм мөһим социаль бурычларны хәл итүне билгели. Бу хакта Россия Федерациясе Премьер-министры Михаил Мишустин Нефть һәм газ сәнәгате хезмәткәрләре көне уңаеннан телеграммада белдергән.

Россия гражданнары өчен мәҗбүри медицина иминияте системасына мәҗбүри дару иминияте системасын кертү буенча закон проекты эшләнә. Бу хакта ЛДПРдан Дәүләт Думасының вице-спикеры Борис Чернышов хәбәр итүе турында РИА Новости яза.

Татарстанда кеше үтерү, һөҗүм итү һәм үлем белән янауда гаепле дип табылган 72 яшьлек ир-атка хөкем карары чыгарылган. Бу хакта Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итә.

Өч билге кешене тиздән үләчәге турында кисәтә ала. Бу хакта хирург һәм онкоуролог Марк Гадзиянның Телеграм-каналына сылтама белән РИА Новости яза.

Татарстан китап нәшриятында Нурлат шәһәрендә яшәп иҗат итүче язучы Илдус Диндаровның «Ак төннәрнең кара көннәре» дип аталган яңа китабы дөнья күрде.

Россиянең көньяк һәм үзәк өлешендә урнашкан Һава гаваньнары 2,6 млрд сумнан артык өстәмә ярдәм алачак. Бу хакта федераль Хөкүмәтнең Телеграм-каналында хәбәр ителә.

8 сентябрь көнне 15.00 сәгатьтә Габдулла Тукайның Әдәби музеенда «Мирас» күргәзмәсе ачыла. Анда Казанның 1 нче һәм 7 нче балалар сәнгать мәктәпләре укучыларының эшләре тәкъдим ителәчәк. Күргәзмә Татарстанда Милли мәдәниятләр һәм традицияләр елына багышлана.

Ел башыннан Россия армиясе контракт хезмәтенә 280 меңгә якын кеше килгән. Бу хакта Иминлек Советы Рәисе урынбасары Дмитрий Медведев Россия Федерациясе Кораллы көчләрен хәрби контрактчылар белән тулыландыру буенча киңәшмәдә хәбәр итте.

Татарстан Рәисе Рөстәм Миңнеханов «ТАССР төзелүгә 100 ел» медале белән бүләкләү һәм мактаулы исем бирү турында берничә карарга кул куйды. Документлар хокукый мәгълүмат порталында дөнья күрде.

Бүген иртән ашыгыч хезмәтләрнең бердәм 112 номерына Сарман авылында аэродром территориясендә мотодельтаплан төшүе турында хәбәр итәләр.

Татарстан Республикасы Рәисе Рөстәм Миңнеханов Акдусның яңа фотосурәтен күрсәтте —фотода алабай яфраклары саргая башлаган миләш тәлгәшләрен «өйрәнә».

Метеорит Төркиянең көньяк-көнчыгышына төшкән. Берничә провинция күгендә янып төшүче кисәкләре күренгән. Бу хакта NTV телеканалына сылтама белән РИА Новости хәбәр итә.

Мәскәүнең «Внуково», «Домодедово» һәм «Шереметьево» аэропортларында 19 рейс тоткарланган, 23е туктатылган. «Яндекс. Расписание.» сервисы мәгълүматлары шул хакта сөйли.

3 сентябрьдә Татарстанда җылы һәм коры һава торышы көтелә. Бу хакта Татарстан Гидрометеорология үзәге хәбәр итә.

Теләче районы Иске Җөри авылында «Китап» радиосы татар җырын башкаручылар арасында «Карачтау авылы көйләре» – Таһир Якупов исемендәге I республика фестиваль-бәйгесенә йомгак ясады. Барлыгы 132 гариза килгән булган, шулар арасыннан 20 лауреатны сайлап алдылар.

Лениногорск нефть техникумы юлдан читтә йөри торган мототранспорт чараларын йөртүчеләр төркемен укытып чыгарды. Бу хакта «Заман сулышы» хәбәр итә.