Новости за 02.09.2023

Шушы көннәрдә Чистайда «Татнефть-Олимп» стадионында мотофестиваль узды. Анда Россиянең төрле шәһәрләреннән мотоциклчылар җыелды. Профессионаллар осталыкларын һәм төрле трюклар күрсәтте. Мотоциклларда төрле яшьтәге кешеләр, алар арасында яшь катнашучылар да бар. Кешеләр барысын да зур кызыксыну белән карады. Бу хакта «Чистай-информ» хәбәр итә.

Азнакайның Мәлбагыш авылында капиталь ремонттан соң балалар бакчасы үачылды. «Татнефть» компаниясе ярдәмендә биредә 3 ай эчендә иске бина танымаслык булып үзгәртелгән. «Азнакай» сайтында шул хакта хәбәр ителә.

Беренче сентябрьдә Түбән Кама мәктәпләре укучылар өчен үз ишекләрен ачты. Тантаналы линейкага 34 меңнән артык бала килде, шулардан 3900е - беренче сыйныф укучылары. Бу хакта Түбән Кама муниципаль районы рәсми сайтында хәбәр ителә.

Әлмәттә Нефтьчеләр көненә һәм шәһәрнең 70 еллыгына багышланган бәйрәм вакыйгалары кунаклары күңелгә үтеп керерлек мизгелнең шаһиты булды. Тантаналы парад вакытында алып баручылар хәзер тамашачының көтелмәгән мизгелгә шаһит булачагын игълан итте. Бу хакта «Әлмәт таңнары» хәбәр итә.

3 сентябрьдә китап уку буенча IQRA (Укы!) халыкара бәйгесенең финалы була. Бу юлы проектның йомгаклау этабы параллель рәвештә Мәскәү, Казан, Уфа һәм Бишкек (Кыргызстан) шәһәрләрендә узачак. Россия Мөфтиләр шурасының матбугат хезмәте шул хакта хәбәр итә.

Каһарман-шагыйрь Муса Җәлил исемендәге 1186 нчы Мәскәү мәктәбе быел беренче сыйныфка 56 укучы кабул итте. Бу хакта Татарстан Республикасының Россия Федерациясендәге Тулы вәкаләтле вәкиллеге хәбәр итә.

Быел кыш «браклы» булачак һәм «рус кышы» статусына туры килмәячәк. Эль-Ниньо феномены аркасында температура климат нормасыннан югарырак, ә һава торышы бик тынычсыз булачак. Бу хакта «Фобос» һава торышы үзәгенең әйдәп баручы белгече Евгений Тишковецка сылтама белән РИА Новости хәбәр итте.

«Бигеш» халыкара аэропортын реконструкцияләүнең чираттагы этабы — очыш полосасын тәртипкә китерү. Бу хакта бүген Татарстан Республикасы Рәисе Рөстәм Миңнеханов һава портының яңа терминалын ачу тантанасында сөйләде.

Бүген Татарстанның Лениногорск районында юл-транспорт һәлакәтендә яшь кыз үлгән. Бу хакта «Татар-информ»га фаҗига шаһитлары хәбәр итте.

Габишево авылы зиратында Татарстанның халык язучысы Гәрәй Рәхимгә кабер ташы ачылды. Күренекле язучыга кабер ташын соңгы бүләк буларак кызы Лилия Апакина гаиләсе куйган.

«Пенза өлкәсенең татар милли-мәдәни автономиясе» төбәк иҗтимагый оешмасында «Тургай» Төбәкара балалар фольклор конкурсының читтән торып (сайлап алу) этабы эшләре каралды. Катнашу мөмкинлеге булмаган балаларның үтенечен искә алып, чыгышларның видеоязмасын җибәрү вакыты 7 сентябрьгә кадәр озайтылды. Бу хакта Пенза өлкәсе татар милли-мәдәни мохтарияте ВКонтакте социаль челтәрендәге үз сәхифәсендә хәбәр итә.

Чаллыда «Бигеш» аэропортында Николай Лемаев исемендәге яңа терминал ачылды. Тантанада катнашкан Татарстан Рәисе Рөстәм Миңнеханов яңа объектның фотоларын телеграм-каналына куйган.

Татарстанда 2023 елга торак төзелеше планы 87,8 процентка тәмамланган. Иң югары әзерлек шәхси йортларны кулланышка тапшыруда күзәтелә — 96 процент. Бу хакта кичә Татарстан Республикасы Хөкүмәте Йортында узган киңәшмәдә республиканың Төзелеш министрлыгы башлыгы Марат Айзатуллин белдерде.

Әлмәттә Нефтьчеләр көне уңаеннан үткәрелгән тантанада иң кызык өлеше һөнәри осталык бәйгесе булган. Бу хакта Татарстан Республикасы Рәисе Рөстәм Миңнеханов үзенең Telegram-каналында язган.

Татарстан Рәисе Рөстәм Миңнеханов Татарстанда су биоресурсларын саклау мәсьәләләре буенча республика советы составына үзгәрешләр кертте. Карар республика җитәкчесенең рәсми сайтында чыкты.

Чувашия республикасы Комсомол муниципаль округының Тукай авылында яңа мәчет төзелеше югары темплар белән дәвам итә.

Татарстан Үзәк сайлау комиссиясендә инвалид гражданнарның сайлау хокукларын гамәлгә ашыруны тәэмин итү буенча эшче төркемнең утырышы узды. Төркемнең составы яңартылганнан соң бу беренче җыелу иде. Бу хакта Татарстан Үзәк сайлау комиссиясенең матбугат хезмәте хәбәр итә.

Бүген Татарстан Республикасы Рәисе Рөстәм Миңнеханов Нефтьчеләр көне уңаеннан Әлмәттә уздырылган тантанада катнашты. Үз чыгышында Рөстәм Миңнеханов әйткәнчә, бүген Татарстан - илебезнең төп нефть чыгару үзәкләренең берсе. Бу турыда Татарстан Рәисенең матбугат хезмәте хәбәр итте.

Мәхмүт Гәрәев исемендәге Габишево мәктәбе педагогларына бәйрәм линейкасында армия генералы Мәхмүт Гәрәевның 100 еллыгына багышланган истәлекле медальләр тапшырылган. Бу хакта Татарстан Республикасының Россия Федерациясендәге Тулы вәкаләтле вәкиллеге телеграм-каналында яза.

Кертемнәрне иминиятләштерү агентлыгы «Татфондбанк» гаммәви акционерлык җәмгыяте кредиторлары белән исәп-хисап өчен өстәмә рәвештә 1 млрд 452,1 млн сум акча җибәрәчәк. Бу хакта дәүләт корпорациясенең матбугат хезмәте хәбәр итә.

Россиядә мәктәптә көмеш медаль алу шартлары үзгәрергә мөмкин. Мәгариф министрлыгы аларны рус теле һәм тагын бер фәннән Бердәм дәүләт имтиханында 60тан ким булмаган балл җыйган чыгарылыш укучыларына тапшырырга тәкъдим итә.

1 сентябрьдән Россиянең дүрт төбәге — Татарстан, Башкортстан, Чечня һәм Дагыстанда — ислам банкларының клиентларга читтән торып хезмәт күрсәтү — банкинг эксперименты эшли башлады. Режим инвесторлар өчен яңа мөмкинлекләр ачачак һәм Россиянең 20 миллион мөселманлы дини җәмгыятенә канәгатьләнү китерәчәк, дип саный Татарстан Инвестиция үсеше агентлыгы җитәкчесе Талия Миңнуллина.

Җырчы Зәринә Вилданова 15 сентябрьдә 18.00 сәгатьтә Татарстан Милли китапханәсендә концерт куя.

Салават башкорт дәүләт драма театры «Зур гастрольләр» кысаларында Татарстан Республикасында спектакльләр тәкъдим итә, 15-17 ноябрьдә исә үз сәхнәсендә Казан театрын кабул итә. Бу хакта «Башинформ» яза.

Бүген Татарстан Рәисе Рөстәм Миңнеханов Әлмәткә Нефтьчеләр көнен бәйрәм итүдә катнашу өчен килде. Биредә ул ремонттан соң яңа уку елына ачылган мәгариф учреждениеләрен карады. Бу хакта республика җитәкчесе матбугат хезмәте хәбәр итә.