Новости за 02.09.2023

Шимбә көнне, 2 сентябрьдә, Татарстанда җылы һава торышы көтелә. Бу хакта Татарстан Гидрометеорология үзәге хәбәр итә.

Күренекле язучы Рашат Низамиев Əтнә районының Олы Бәрәзә авылы зиратына җирләнәчәк. Бу аның хатыны Нәсирәнең туган авылы.

Төркиянең көньяк-көнбатышында автобус белән юл-транспорт һәлакәтендә зыян күрүчеләр арасында Россия гражданнары юк. Бу хакта Денизли шәһәре полиция идарәсе хәбәр итә, дип яза РИА Новости.

Татарстан Рәисе Рөстәм Миңнеханов Алексеевск-Әлмәт түләүле трассасы участогы төзелеше барышын карады. Бу хакта ул үзенең Телеграм-каналында сөйли.

Татарстан Рәисе Рөстәм Миңнеханов Нефть һәм газ сәнәгате хезмәткәрләре көне белән котлады. Бу хакта республика җитәкчесенең матбугат хезмәте хәбәр итә.

Татарстан балалар өчен сәнгать мәктәпләре саны буенча Идел буе федераль округы төбәкләре арасында – беренче, Россия буенча бишенче урында тора. Аңардан алда – Мәскәү өлкәсе, Краснодар крае, Свердловск өлкәсе һәм Мәскәү шәһәре, дип хәбәр итә РФ Мәдәният министрлыгы.

Татарстан икътисад министры урынбасары Юлай Миңнуллин «Белемең белән уртаклаш» марафоны кысаларында Түбән Каманың 36нчы мәктәбе өлкән сыйныф укучылары өчен ачык дәрес үткәрде. Анда ул Татарстан Республикасының социаль-икътисади үсеше турында сөйләде. Бу хакта Түбән Кама муниципаль районы рәсми сайтында хәбәр ителә.

Балтачның Алан авылында мәктәп һәм балалар бакчасы ачылды. Әлеге тантаналы чарага килгән кунакларны укучылар ипи-тоз һәм чәкчәк белән каршы алды. Бу хакта «Хезмәт» газетасы хәбәр итә.

Саба аграр көллиятендә 1 сентябрьдә иртәнге сәгать 10да башланган Белем бәйрәме быел 115 егет-кыз өчен беренчесе булды. Күбесенең әти-әниләре дә тантаналы линейкада катнашты. Бу хакта «Саба таңнары» хәбәр итә.

Кукмара аграр көллияте базасында «Авыл хуҗалыгы» юнәлеше буенча укыту-производство үзәге ачылды. Анда барлыгы 140 студент — район көллиятеннән — 70, Әтнә, Арча, Мамадыш һәм Сармандагы уку йортларыннан тагын 70 студент белем алачак. Бу хакта «Хезмәт даны» хәбәр итә.