Новости за 20.08.2022

Алабугада иске туку фабрикасын реставрациялиләр. Алабуга муниципаль районы башлыгы матбугат хезмәте мәгълүматы буенча, тарихи бинада кунакханә комплексы урнашачак. 

Сихтермә-Хузангай авылында православие динендәге әлкилеләр күптәнге гадәт буенча Бал спасын билгеләп үтте.

Азнакай районының иң матур урынында Чатыр Тау итәгендә ял итү урыны — глэмпинг зонасы төзелде.

Питрәч районынның үзәк китапханәсендә Татарстан Язучылар берлеге әгъзасы, Саҗидә Сөләйманова исемендәге әдәби премия лауреаты, Габдулла Кариев исемендәге Казан Татар Дәүләт яшь тамашачы театры җитәкчесе Луиза Янсуарның туган көне уңаеннан шигъри кичә оештырылды.

Татарстанда, профилактик эш алып барып, урман янгыннары чыгуга юл куймау мөһим, дип белдерде Татарстан Республикасы Президенты Рөстәм Миңнеханов. Бу турыда ул республиканың Министрлар Кабинетында узган киңәшмәдә әйтте. Район башлыкларын ул янгыннарны «катгый кисәтергә» өндәде.

Татарстанда Идел буе федераль округы субъектлары арасында сөт, каймак, карабодай һәм атланмайга иң түбән бәяләр саклана. Бу хакта бүген ТР Хөкүмәте Йортында узган республика киңәшмәсендә республиканың авыл хуҗалыгы һәм азык-төлек министры Марат Җәббаров хәбәр итте.

Бүген Татарстанның нефть башкаласында «Әлмәтнефть»нең 70 еллыгына багышланган тантаналы чара узды. Ул «Татнефть» гавәми ачык җәмгыяте системасында алдынгы нефть-газ чыгару идарәләренең берсе булып тора. Республика җитәкчелеге исеменнән ветераннарны һәм идарә хезмәткәрләрен Татарстанның Дәүләт Советы Рәисе Фәрит Мөхәммәтшин котлады.

Казанның Горький паркында Идел буе халыкларының яңа этник мәдәниятенә багышланган «Итил» фестивале уза. Анда төрле этник юнәлешләрне һәм музыка жанрларын тәкъдим итүче дистәләгән коллективлар, этноярминкәләр һәм меңләгән кеше катнаша.

Бүген төнлә Казанның Вишневский урамында 7 каттан өлкән яшьтәге ир-ат егылып төшкән. Бу турыда полициягә аның туганы шалтыратып әйткән. Фаҗига урынына килгән табиблар бригадасы пенсионерга берничек тә ярдәм күрсәтә алмаган – ир шунда ук үлгән, дип хәбәр итте «Татарстан-24» каналы хәбәрчесе.

Казахстанда быел беренче сыйныфка барасы укучыларның 70 проценттан күбрәге казах телендә укытуны сайлаган. «Казинформ» бу турыда Казахстан Республикасының Мәгариф министрлыгы мәгълүматларына сылтама белән хәбәр итә.

Татарстан Республикасының сигез районындагы мәктәпләрдә төзекләндерү эшләре тәмамланды. Бүген бу хакта Татарстанның төзелеш, архитектура һәм торак-коммуналь хуҗалык министры Марат Айзатуллин хәбәр итте. Министр Хөкүмәт Йортында узган республика киңәшмәсендә шул турыда сөйләде.

Нидерландның Эйндховен шәһәре янындагы Велдховен дип аталган җәмгыятендә билгесез затлар бүген иртән мәчеткә ут төрткән. Төркиянең «Анадолу» агентлыгы сайты шул турыда яза.

Татарстан Сәламәтлек саклау министрлыгына коронавируска коллектив иммунитетны арттыру буенча эшне көчәйтергә кирәк. Бу хакта Татарстан Президенты Рөстәм Миңнеханов Хөкүмәт Йортында узган шимбә киңәшмәсендә белдерде.

«Спектакльләрне куйганда артист татар телендә сөйләшергә тиеш була. Чыгыш ясар өчен кешеләр татарча сөйләмне ятлап чыгыш ясый», - диде ул.

«Спокойной ночи, малыши» тапшыруында Филя булып сөйләгән актер Сергей Григорьев 64 яшендә вафат булды. Бу хакта «Российская газета» яза.

Соңгы тәүлек эчендә Татарстанда 115 кеше коронавирустан чирләгән. 74 кешене хастаханә шартларында дәваларга кирәк булган. Стопкоронавирус.рф порталында шундый мәгълүматлар күрсәтелгән.

ОРВИ билгеләре булган балалар һәм укытучылар белем бирү учреждениеләренә кертелергә тиеш түгел. Бу чара җыелышларга йөрүче ата-аналарга да кагыла, дип хәбәр итте Роспотребнадзор хезмәтенең Татарстан буенча идарәсе җитәкчесе Марина Патяшина. Бу хакта ул бүген республиканың Министрлар Кабинетында узган брифинг барышында әйтте.

1 сентябрьдә мәктәпләрдә бәйрәм линейкалары гадәти режимда узачак. Бу хакта бүген республиканың Министрлар Кабинетында узган брифингта Роспотребнадзор хезмәтенең Татарстан буенча идарәсе җитәкчесе Марина Патяшина хәбәр итте.

Кичә Татарстанның Минзәлә районы Степановка авылы янында үлем белән тәмамланган юл-транспорт һәлакәте булды. Кичке җиденчедә «Лада» автомобиле йөртүчесе велосипедта барган 14 яшьлек малайны бәрдергән. Алынган җәрәхәтләрдән яшүсмер шунда ук үлгән.

Казанның Дәрвишләр бистәсендә 6 нчы санлы балалар поликлиникасын төзү эшләре дәвам итә. Бу хакта Татарстанның Сәламәтлек саклау министрлыгы матбугат хезмәте хәбәр итә.

Татарстан халкына җәмәгать урыннарында һәм транспортта битлек кияргә тәкъдим иттеләр. Бу хакта бүген республиканың Министрлар Кабинетында узган брифингта Роспотребнадзор хезмәтенең Татарстан буенча идарәсе җитәкчесе Марина Патяшина хәбәр итте.

Куйбышев сусаклагычына 32 меңнән артык чөгә (стерлядь) балыгы маймычлары җибәргәннәр. Бу эшне Табигатьне саклау акциясендә катнашкан Татарстаннан вәкилләре башкарган. Республиканың Биоресурслар буенча дәүләт комитеты матбугат хезмәте шул турыда хәбәр итә.

Татарстан #БЕЗБЕРГӘ халыкара премиясе ярымфиналистлары саны буенча лидер-төбәкләрнең бишлегенә керде. Республика бу этапта 63 проект тәкъдим итәчәк, дип хәбәр итте Татарстан Республикасы Яшьләр эшләре министрлыгы матбугат хезмәте.

Татарстанның кече инновацион предприятиеләренең, «Старт-1» конкурсында катнашып, Инновацияләргә ярдәм итү фондыннан 4 миллион сумга кадәр грант алу мөмкинлеге бар. Бу хакта республика Икътисад министрлыгының матбугат хезмәте хәбәр итә.

Әтнә театры үз радиосын эшләтеп җибәрде. «Аны безнең сайтыбыздан тәүлек әйләнәсе тыңларга мөмкин», дип хәбәр итә Театр директорының маркетинг һәм PR буенча урынбасары, шагыйрә Гөлүсә Батталова.