Новости за 20.08.2022

Быел Татарстанның Алексеевск шәһәр тибындагы бистәсендә ясалма бозлы, өсте ябулы шугалак төзелеше төгәлләнәчәк. Бу эшләр «Демография» илкүләм проектын гамәлгә ашыру кысаларында башкарыла, дип хәбәр итә ТР Спорт министрлыгы матбугат хезмәте.

Ел саен Яңа Чишмә районында «Мәктәпкә җыенырга ярдәм ит» хәйрия акциясе үткәрелә. Акция аз керемле гаиләләрдәге балаларга, инвалид балаларга һәм күп балалы гаиләләргә социаль ярдәм күрсәтүгә юнәлдерелгән.

Актаныш районындагы әрмән җәмгыяте һәм аның җитәкчесе Алик Авдарян җәйге карусельда ял оештырды. Мөмкинлекләре чикләнгән сабыйлар карусельда атынды, батутта сикерде, татлы мамык белән сыйланды.

Бүген Чирмешән районында иң кирәкле һөнәр ияләре – машина йөртүчеләр, тракторчылар, шулай ук агрономнар, ветеринария табиплары һәм инженерлар. Эшче һөнәрләргә дә ихтыяҗ зур. Район оешмалары мәшгульлек үзәгенә 62 вакансия – эш урыны тәкъдим иткән. Бу турыда «Безнең Чирмешән» сайтында хәбәр ителә.

Питрәч авылыннан Россия Герое Иван Додосов һәм район башкарма комитеты җитәкчесе Альберт Хәбибуллин Яңа Шигали авылында яшәүче Бөек Ватан сугышы ветераны Алексей Макаровны туган көне белән котлады. Аңа 96 яшь тулды. Бу хакта «Алга» газетасы сайтында хәбәр ителә.