خېبرپښتونخوا کې د ښاروالیو د انتخاباتو یو کاندید وژل شوی
پولیس وايي چې عمر خطاب شېراني تېره شپه په ډېره اسماعیل خان سیمه کې د دوو موټر سایکل سپرو په ډزو ووژل شو.
شېراني چې د پاکستان د عوامي نیشنل پارټۍ غړی و، د ښاروالیو په انتخاباتو کې چې سبا د ډسمبر په ۱۹مه نېټه په پام کې دي، کاندید و.
په ډېره اسماعیل خان ولسوالۍ کې د عوامي نېشنل ګوند یوه سیمه ییز مشر د ازادۍ راډیو مشال څانګې ته وویل چې د شېراني مړی نن سهار د هغه د کور د مخې پر سړک وموندل شو.
د دې وژنې پړه تراوسه کومې ډلې نه ده منلې.
د پښتون ژغورنې غورځنګ د مرکزي کمېټې غړي شاهد شېراني مشال راډیو ته وویل، د عمرخطاب شېرانې د قتل عاملان باید ژر تر ژره د قانون منګولو ته وسپارل شي: "په دې ملک کې یو کس انتخاباتو ته درېږي یو ذمه وار کس وي یو وکیل وي او د ېوه سیاسي ګوند مشر هم وي، داسې وژل کېږي چې لس یوولس ساعته یې معلومات نه کېږي نو د پښتون ژغورنې غورځنګ غوښتنه کوي چې ژر تر ژره د ده قاتلان معلوم شي."
د ډېره اسماعیل خان پولیس وايي چې د شېراني د قتل د عاملانو د نیولو لپاره یې عملیات پیل کړي دي.